Anda di sini

Pengepuh Kalsum nupi sida sebilik enggau mayuh pengurang ngenyinu

Advertisement

LIMBANG: Nupi diri sebilik lalu ngemesaika tiga iku anak enggau mayuh pengurang diumba nadai laki sigi utai ke chukup berat ba sekeda indu.

Taja pia, indu tu puh, Kalsum Tamba, 36, ari Pen­ganan ditu, sanggup napi pe­medis laban deka meda baka anak iya ulih belajar menyana baka orang bukai.

Laki iya bisi penanggul sakit untak ngujungka iya dianjung berubat ba Sabah kenyau Disember taun nyin kemari.

Bekaul nya iya mih megai tanggungpengawa nyadi ketuai bilik lalu gawa nyadi tukang sumai.

Taja penatai pemisi nyadi tukang sumai enda chukup dikena nupi bala anak, iya enda kala muchau.

Bantu ari Opis Pengintu Pengelantang Raban Bansa (JKM) mega dikena melanja pelajar bala anak ke agi beekula.

Berindik ari nya, Kelab Rekreasi 1Malaysia (KR1M) Parti Demokratik Progresif (PDP) Batu Danau, nengah kerejasama Tabung Baitul­mal Sarawak enggau JKM ngelawa indu tu kemari.

Chairman KR1M Lim Goon Tee madah, kelim­pah laki iya ti sakit untak, pendiau rumah sida mega chukup ngenyinu ati sida tu datai nyuaka bantu dikena ngurangka penyuntuk.

“Bantu tu dikearap ulih ngelempungka tating belanja ruang bilik Kalsum tu idup enggau penuh pemerinsa ngemesaika bala anak.

“Kitai deka terus ngabas sida, laban sida endang be­gunaka bantu,”ku iya madah ngagai media, kemari.

Exco Nembi ak PDP Nengeri Kaunselor Daniel Taha madah, parti politik deka terus bekerejasama enggau ejensi perintah bekaul enggau pengawa nyidi rayat ke seranta.

“Kerejasama tu beguna amat dikena nentuka pen­gawa meri bantu nya ulih nyapai jukuk setipak enggau juluk perintah ti benung ny­idi sida ti begunaka bantu,” ku iya.

Iya udah nya minta raban orang biak patut regas be­jalaika pengawa meri bantu sereta nulung rayat mayuh ti napi penyeranta ba pelilih tu.

Ba penemuai nya kemari, entara bantu ke diberi nya nyengkaum barang ke diguna ninting hari enggau maya duit disua ngagai Kalsum.

Bela bisi datai Ketuai Pam­pang TBS Limbang Junidi Lamat, Pemesai JKM Lim­bang Monir Besar, Kaunselor Cecalia Lim enggau ketuai raban bansa bukai.

Advertisement