KUCHING: Presiden parti Progresif Demokratik (PDP) Datuk Seri Tiong King Sing dipelaba deka mantraika nama chalun ke dipilih parti ungkup sitak Saratok pagila (Hari Enam).
Nitihka penerang ari dalam parti, pekara nya deka dipansutka ba pengerami Ketuai Begulai enggau Rayat ke deka diatur ba Rh Jabu, Ng. Senulau.
Penerang ari dalam parti nya mega madah, chalun ke dipilih presiden parti nya ukai reti nyadi chalun ke diputuska BN.
“Dalam BN, presiden parti semina tau madahka nama chalun ti dipilih sereta udah dirintai pandak, tang ketuai tetinggi BN deka ngaga pemutus.
“Naka ke ditemu PDP, orang ke dipilih parti nya bepelasarka timbal ari bala rayat ke ngelama tu,” ku iya.
Penerang ari dalam parti nya mega madah taja pan parti udah milih chalun, tang sebarang pekara tau nyadi dalam timpuh ari maya nama chalun ke dipilih nya dibantaika nyentuk ke maya ngantung nama laban chairman BN nengeri Datuk Abang Johari Tun Openg enggau Mohd Najib Tun Razak agi tau ngaga ubah sempil enggau maya pengawa bepilih ila.
Ku iya, ketuai tetinggi BN bisi kuasa ngubah, ke alai sida tau engkah sesapa aja chalun dalam timpuh sebelas jam ke penudi.
Peneramg nya mega madahka PDP udah ngelala tiga nama, orang dagang Subeng Mula enggau Basil Thomas sereta siku pengemeran pengawa berubat, Dr James nyadi chalun di Saratok.
Ku iya madah, nama nya dipelaba deka dikurang nyadi siku aja pagila.
“Sekalika nya Subeng tauka Dr James. Ki tai sama nganti presiden mantaika nama chalun ke dipilih parti ungkup Saratok.
“Baka ke udah dipadahka aku, sebarang utai tau nyadi ari timpuh nya nyentuk ke hari ngantung nama,” ku iya.
Aum Kunsil Besai PDP beberapa bulan ke udah, ngaga pemutus ngenanka semua penyandang baka di Baram (Anyi Ngau), Bintulu (Tiong) enggau Mas Gading (Dato Anthony Nogeh) napi Pengawa Bepilih Besai Ke-14 (PRU14) tu ila.
PDP, ke dikelala sebedau ngena nama Parti Progresif Demokratik Sarawak (SPDP), menang ba semua empat sitak parlimenke endur bediri minta pilih nyengkaum Saratok, nengah Tan Sri William Mawan Ikom ba pengawa bepilih besai taun 2013.
Taja pia Mawan, ningkilka diri ari parti ketegal penyarut dalam parti kena bulan Mei, 2014 lalu nyadi kaban sebuah parti ti baru ditumbuh iya nya Parti Tenaga Rakyat Sarawak (Teras).
Ba taun 2016, iya udah nyadi chalun terus ngenanka sitak kunsil nengeri Pakan, ke alai iya udah menang.
Teras udah nya direrak kena 11 Mei, 2016. Ketegal nya, Mawan lalu nadai parti.