KUCHING: Komuniti Dayak di Sarawak lenyau siku pemesai ketuai Dayak, siku veteran ke mayuh udah mayuh meri sukung ngagai pemansang komuniti Dayak sereta Sarawak.
Sapit Kepala Menteri Datuk Amar Douglas Uggah anak Embas madah semanjai ex-Speaker Kunsil Nengeri, Tan Sri Celestine Ujang anak Jilan, mungkal gawa mangku pengawa nyadi Menteri ari taun 1974, lalu bepinchin dalam taun 2001.
Dalam kandang taun nya ku iya, niang bejalaika pemerat pengawa iya di Parti Pesaka Bumiputera Bersatu (PBB) nyadi Ketuai Pemuda.
“Aku empu kala gawa baruh iya lebuh nya. Aku beratika iya komited endar mantu sereta nyerakup komuniti Bumiputera, laban ba penemu iya, semian nengah penyerakup aja ke ulih ngempung komuniti Dayak, sama nyingkang enggau Bumiputera bukai nuju pemansang.
“Kelebih agi maya nya, penanggul meskin seranta agi nyadi penanggul ke besai di Sarawak. Niang ngembuan pengawa ke berat maya nya, ngiga jalai ngemunaska meskin seranta kelebih agi ba komuniti menua pesisir.
“Niang mega nyadi ‘mentor’ aku laban lebuh aku begulai enggau iya dalam taun 1977, aku beratika pemerat ke diangkatka iya, betatika pemerat ke Bumiputera beserakup baruh siti perabung,” ku iya.
Uggah ti mega nyadi Sapit Presiden PBB madahka niang kala madah, ketegal penyerakup, kitai ulih mai komuniti Dayak begulai enggau Bumiputera bukai nuju pemansang ke kedeka kitai.
“Ba niang, utai ke berat, iya nya penyerakup, sereta ngangkatka parti. Nya alai, dalam taun 1987, kes ‘Ming Court Affair’ ke tebilang nya, sekeda ari ADUN PBB mutus ati pindah ngagai parti bukai, tang niang agi mengkang enggau parti (PBB).
“Iya pechaya nadai parti bukai ulih ngangkatka Sarawak ngagai abad ke-21 tang semina PBB aja,” ku iya.
Niang mega ku Uggah, ngembuan tanggung pengawa ke berat ngempung sereta ngaga polisi Perintah, pemansang NCR enggau Tanah.
Maya nya ku iya, niang mangku pengawa nyadi Menteri Tanah, alai iya bisi ngaga formula begempung enggau sektor peribit enggau sida ke bempu tanah NCR.
“Diatu kitai beratika setengah juta hektar tanah kitai di menua tu masuk program baru tu, lalu pengawa bukai iya ke dipeda kitai dalam pemansang nembiak,” ku iya.
Pengudah bepinchin ku Uggah, niang nyadi kaban aktif Dayak Cultural Foundation (DCF), alai niang nyadi ketuai dalam pemansang Adat Pesaka sereta nyadi Penyanding Penemu di Dewan Dagang Dayak enggau Industri (DCCI.
“Kami berasai puang endar…Niang agi meri sukung mantu kami ngemansangka adat pesaka di DCF taja pan maya nya niang udah enda entu gerai. Kitai lenyau siku ketuai, sereta pangan.
“Ngarika kami sebilik sereta komuniti Dayak, kami ngenataika penyinu ati ngagai Puan Sri Elizabeth Pawa anak Edwin Ruggis enggau sida sebilik, lalu kita sama besampi ngambika semengat iya diau enggau selamat,” ku iya, ke penudi ia endar ngabas niang pun bulan Disember 2017.