Anda di sini

Komeok : Perintah Nengeri patut ngaku perambu BHF ba Kar Komuniti Penan

Advertisement

KUCHING: Komuniti Penan minta Perintah Nengeri ngaku perambu Projek Baram Herritage Forest (BHF) ke ba dalam Kar komuniti Penan ti mungkur tanah pemesai sejuta hektar.

Nitihka penerang Koordinator Gerempung Keruan, Komeok Joe, perambu projek nya mungkur kandang endur di Ulu Baram, Baram Tengah, Apoh, Tutoh, Mahoh enggau di Ulu Limbang.

Projek BHF ulih nentuka kampung komuniti Penan diintu enggau manah lalu diseliah ari sebarang pengawa ti tau ngeruga pemanah rampa menua,”ku iya.

Iya mansutka jaku nya ba siti aum pengarang berita ke diatur di Indu Opis PKR ditu, kemari.

Ngenang kaul ke sama, Komeok madah Kar Komuniti Penan ke begunaka timpuh 15 digaga udah disua ngagai Sapit Kepala Menteri Datuk Amar Douglas Ugggah kenaka 17 November 2017 di Komplek DUN.

Ku iya, kar nya ukai semina nyadi pesaka bansa Penan ke patut diintu, tang deka nyadi pengingat ungkup Penan sentang sejarah aki ini ti magar genturung pendiau sida.

Ungkup bansa Penan, tanah chukup beguna ketegal ti nyadi pun pemisi ekonomi.

Enti diintu enggau manah sereta dikemansang, tanah ulih ngenataika pemisi belanja ngagai orang asal sereta mai pengelantang,”ku iya.

Iya nambah, 60 peratus ari diversiti dunya maya ke diatu bisi dikampung bansa penan.

Sebarang pengawa ti tau ngerusak rampa menua ku iya ukai semina deka meri empas ba gaya pengidup bansa Penan tang mega ngagai semua.

Berindik enggau nya kami chakah ba pengawa ngemujur Projek Kar Komuniti Penan kenyau 15 taun ke udah.

Kami mantaika perambu kelimpah ti bekunsi penau sentang chara ngintu sereta nguna semua utai ti idup dalam kampung bansa Penan,’ku iya nandu.

Komeok ti bejaku ngarika bansa penan ngarapka Perintah Nengeri meratka pinta nya.

Kami enggai ngadu randau enggau orang tauka ketuai ti nadai kuasa ba sentang isu ke bekaul enggau hak tanah, tandu iya.

Kar Komuniti Penan (23 iti) ngundan penerang sentang 63 komuniti, 7000 sungai, 1500 iti pun kayu enggau utai bukai.

Bela datai Chairman PKR Baru Bian, Mandal Chairman See Chee How, Penghulu Baram Sungai Patah, Ajeng Kiew enggau ketuai bansa Penan ke bukai.

Advertisement