Raban media diperansang nerang silik bekaul agih ungkup S’wak ari Perintah Besai
KUCHING: Raban pengemeran media menua tu diperansang bejalaika pangku pengawa besai nerangka isi agih belanja Bajet 2018 ungkup Sarawak, ti dibantaika Menteri Besai, Datuk Seri Najib Razak dalam bulan Oktober tu tadi.
Menteri Kereja Raya Dato’ Sri Fadillah Yusof madah, iya dekaka media Sarawak mantu perintah kelebih agi opis menteri iya, naburka penerang baka ni agih belanja dalam Bajet 2018 ti diberi ngagai Sarawak ulih dikena memanah.
“Aku ngasaika Bajet 2018 tu nyadi bajet mungkur semua serak komuniti, ari sida ke agi idup, udah midang sereta nyengkaum sida ke bedau ada.
“Ambika chunto taun tu, agih belanja RM1 bilion ungkup Sarawak baka ti dibantai dalam Bajet 2018 dikena ngangkatmanah sekula tuai, deka dirumban nengah chara Sistem Bangunan Berindustri (IBS).
“Reti iya, ukai semina Opis Kereja Raya (JKR) aja patut nyikap diri nentuka raban sida ulih ngelangkar kelimpah nyediaka projek, tang bala kunteriktor, konsultan enggau pemekal patut bela nentuka agih belanja tu dikena memanah laban tuju pengawa kitai ungkup rayat,” ku iya.
Iya mansutka jaku tu lebuh bejaku rambau Pengerami Makai Lemai Ngenang Pemanah Pengawa Media Opis Menteri Kereja Raya (KKR) di sebengkah hotel tebilang ditu, malam Hari Enam tu tadi.
Bisi 12 iku pengarang berita enggau tukang gambar nerima Anugerah Media Kaunsil Pemansang Industri Pengawa Ngaga Begunan Malaysia (CIDB) 2017 diatur KKR enggau Kerejasama CIDB.
“Tu sebagi ari pangku pengawa besai bakih media nentuka baka ni pejalai pengawa ngemanahka sekula tuai di nengeri tu enggau meruan nitihka standard sereta mega nitihka agih belanja ditetap,” ku Fadilah.
Nya kebuah iya ngelalau bala media Sarawak terus nyadi pematau ti seruran ngeripot enggau meri timbal ti betul ngambika juluk perintah ti deka nyediaka infrastruktur menyana ngagai rayat enggau nengeri tu ulih dijapai.
Ngelansa pasal pengerami nya, ku Fadillah, iya dikena ngenang pemanah pengawa bala pengarang berita kelimpah ngaku kereja ngarang berita pengawa berumah menua tu pemadu manah di nengeri Sarawak.
“Dikearap pengerami tu nyadi pelasar nanggam agi kaul, bekelala enggau pangan diri, bekunsika penemu enggau ngerembaika buah runding ba pengawa KKR mansang ke mua napi pemar kemaya hari,” ku iya.