Anda di sini

Ubah ba Kod Tanah enda ulih digaga berumban

Advertisement

Perintah ukai enggai mantu Dayak, kitai mega siruka Bumiputera ti bisi penanggul ba tanah

KUCHING: Ubah ba Kanun Tanah Nengeri bekaul enggau Pulau Galau enggau Pemakai Menua (PMPG) enda ulih digaga enggau berumban, nadai beratika semua chara mutarka iya.

Sapit Kepala Menteri Datuk Amar Douglas Uggah mansutka jaku nya, nyema digaga berumban, dikenangi deka bisi pengelemi tauka pengilap, nya alai, ubah deka digaga baru jemah.

Iya nyemetak madahka perintah nengeri ukai nangguhka ubah sereta ukai enda sinuka penanggul ditapi rayat.

Perintah ukai enggai mantu Dayak, kitai mega siruka Bumiputera ti bisi penanggul ba tanah.

Sida ti nuduh kitai ngayahka Dayak patut meretika pengawa digaga perintah. Perintah enda sama enggau gerempung ukai dikuasa perintah (NGO) tauka orang ngatika ti semina nemu bejaku aja,” ku iya lebuhka dirandau di opuis iya di Aum Kunsil Nengeri (DUN), kemari.

Iya dipinta ngelansa pasal peminta seraban orang ti minta perintah ngaku PMPG. Raban tu ngatur gempuru likun di Tebing Sungai Kuching enggau di lama Kort Kuching, kemari.

Raban nya mega nyuaka memorandum ngagai pengari Kepala Menteri Datuk Patinggi Abang Johari Tun Openg di lama DUN pengudah beberapa jam begempuru di Tebing Sungai Kuching, berengkah urung pukul 8 pagi.

Uggah ke nyadi Chairman Komit PMPG madah usul bekaul enggau pekara nya ti nguji dibai Kaban Kunsil Nengeri (ADUN) Ba’ Kelalan Baru Bian rambau DUN sekali tu nadai nerima sukung ari perintah.

Usul nya ditulak ko iya ukai ketegal perintah enda setuju tang komiti nya diatu benung ngulihka penerang, bejurai enggau nguji ngiga chara mutarka penanggul.

Usul ti deka dibantaika Baru Bian enda ngaum semua lalu enda ulih mutarka penanggul ti ditapi diatu. Perintah deka ngiga jalai pemutar iya,” ku iya.

Iya nyemetak madah, Abang Johari suah nandu penetap perintah nengeri bekaul enggau isu nya ti madahka sida ngaku PMPG.

Uggah udah nya ngenggaika iya kala ngeluarka penerang ke alai ubah ba kanun tanah deka dibantaika iya maya DUN Sarawak sekali tu. DUN berengkah ari 8 nyentuk 17 November tu.

Ngelansa pasal pengandal rayat ngagai Barisan Nasional (BN) maya Pengawa Bepilih Besai Ke-14 (PRU14) berindik ari isu PMPG, ku iya, rayat dikeandal deka terus nyukung sida.

Aku andal amat rayat deka nyukung BN baru maya PRU14.

Sabar lalu beri awak ngagai perintah. Kami dipilih kita lalu tanggungpengawa kami ngiga chara mutarka sebarang penanggul ti ditapi rayat,” ku iya.

Advertisement