Sida ke enda mujur dalam peresa Psikometrik deka diberi peluang ngambi peresa nya kena 30 Nov
KUCHING: 75 iku pengajar interim ke enda mujur dalam peresa Psikometrik agi diberi peluang ngambi peresa nya kena 30 November tu di IPG Tun Abdul Razak, Samarahan, jaku tu dipansutka Menteri Pelajar, Sains enggau Pansik Teknologi, Dato Sri Michael Manyin anak Jawong ba aum media di Aum Kunsil Nengeri (DUN) ditu, kemari.
“75 iku pengajar interim ke enda pas ba peresa Psikometrik kedua tu tadi agi diberi peluang ngambi peresa Psikometrik tang tu ke penudi,” ku Manyin.
Dalam taun 2016, urung 601 graduet ke nembuka pelajar sida iya di Palan Pelajar Tinggi Perintah (IPTA) enggau Palan Pelajar Tinggi Peribit (IPTS) bisi diberi pengawa nyadi pengajar interim bepelasarka bisi endur kusung sereta pemerat sekula sekondari di Sarawak.
“Ari penyampau nya, urung 392 pas peresa Psikometrik, enggau 209 enda pas.
“Baka pengajar interim, sebedau sida dipadu ba penuduk ke tetap nyadi pengajar, sida enda tau enda ngambi peresa Psikometrik ke digaga Palan Pematih Pengajar Malaysia (IPGM) ,” ku iya.
Bedau lama tu tadi bala pengajar interim ke enda pas peresa Psikometrik bisi betemu enggau media, minta perintah mantu sida nyadi pengajar baru, sereta diberi peluang ngambi peresa Psikometrik baru.
Manyin empu udah betemu enggau Menteri Pelajar Malaysia Dato Sri Mahadzir Khalid minta dikemendarka pengajar interim tu diberi peluang baru beperesa Psikometrik, alai nangkan ke nya, peminta udah dikemendar.
“Nya alai, 30 November tu peresa peluang ke penudi ke 75 pengajar interim,” ku iya.
Ba lansa bukai, Direktor Pelajar Sarawak, Rakayah Maadon madahka penyampau 90:10 pengajar nengeri tu enggau nengeri bukai baka ke kala disadang ex-Kepala Menteri niang Pehin Sri Tan Sri Adenan Satem, diatu udah nyapai 88 peratus di sekula sekondari sereta 85 peratus di sekula primari.
“Semina ke ba sekula primari deka ditambah agi pemayuh pengajar ke ulih ngajar dia,” ku iya.