KUCHING: Pengerami Hari Nembiak Renggat Negeri Sarawak 2017 deka diintu di Betong kenaka 27 nyentuk ngagai 29 Oktober 2017.
Ngempung beribu raban nembiak ari selampur Sarawak, pengerami deka dipenyadi Kepala Menteri Datuk Patinggi Abang Johari Tun Openg kena 28 Oktober di Dewan Sukan Tan Sri Datuk Amar Stephen Kalong Ningkan.
Nitihka penerang Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah, Anugerah Belia Sarawak deka diberi ngagai sekeda raban nembiak ke nyulut ba pengawa sida.
Gelar nya mungkur kategori lelaki, orang Indu enggau gerempung nembiak.
"Raban nembiak lelaki enggau orang indu sereta gerempung nembiak ke udah nyulut ba pengawa sida deka nerima gelar " Anugerah Belia Sarawak 2017" lalu deka disua Abang Johari,"ku Abdul Karim ba aum pengarang berita di Begunan Baitulmakmur ditu, pagi tadi.
Dulu agi ari nya iya udah nguluka aum pengerami ngintu Hari Nembiak Renggat Negeri Sarawak 2017.
Ku iya nambah, randau "Youth Townhall' begulai enggau Abang Johari deka diadu pengudah tembu pengawa bejadi di palan ke sama.
Entara sekeda program ke bisi ditusun rambau tiga hari pengerami iya nya Belia Idol & Battle of the Band, Konsert Belia, Belia Kitchen, Youth Rock Climbing, Youth Fun Run sereta ke bukai.
Pengerami diatur enggau tuju meri basa ngagai pengawa ke udah diadu raban nembiak ba atur pemansang di nengeri tu ngelamatu.