KUCHING: Tun Mahathir deka datai sereta meri licha di Kuching kena Hari Minggu, 24 September tu.
Penemuai nya deka nyadi penatai keterubah Mahathir ke Sarawak pengudah dichiri nyadi Chairman Pakatan Harapan (PH).
Chairman PH Sarawak Chong Chieng Jen ba aum pengarang berita kemari madah Mahathir deka meri licha ba palan endur ngengkah entukar Everise Department Store di BDC Kuching.
Program nya ku Chong deka berengkah jam 7 lemai lalu bela digulu raban ketuai PH ke bukai baka ke Lim Kit Siang(DAP) enggau Dr Hatta(AMANAH).
“Kitai pechaya Mahathir bisi mayuh pekara ti deka dipekunsi maya nya. Pengelama idup, iya udah nyadi ketuai UMNO/BN.
“Diatu ba umur 92 iya mutus ningkilka diri ari UMNO lalu deka ngelaban UMNO/BN,’ku Chong ba Indu Opis DAP ditu, kemari.
Chong ke mega Chairman DAP Sarawak nambah semua pekara ke nyadi diatu mandangka Najib enggau UMNO ngembing menua nengah jalai ti nuju pengerusak.
Chong pechaya nadai chara bukai ke ulih nyelamat menua kelimpah ari nukar perintah ke alai Mahathir chukup berat ba atur ngaduka ubah tu.
“Aku pechaya raban penyukung ke ba ‘atas pagar’ enggau sida ke kala nyukung BN meretika kebuah Mahathir ningkilka diri ari BN.
“Pekara tu deka ngubah runding penyukung BN. Perintah BN ke diatu udah enda betul lalu pekara nya diasaika kitai ninting hari.
“Penatai pemisi menua majak nurun lalu ulah makai suap ba perintah majak nyadi. Nadai kelai mandangka ulah tu bisi kurang,’ku Chong nambah.
Berindik enggau nya, Chong ngelalau semua peranak Sarawak kelebih agi ke diau di Mengeri Kuching datai bebala mayuh mendingka licha nya lalu nyukung atur ‘Nukar Perintah’.
Jaku ansak ‘Ubah Perintah’ tu ukai ungkup pemaik diri tang ungkup semua peranak enggau bala nembiak kitai jemah ila, tandu Chong.