SIBU: Gerempung Veteran Tentera Malaysia Nengeri Sarawak (PVTMS) deka nyuaka chek Bantu Pengelantang Pendiau ngagai lapan iku kaban gerempung nya ke mega dikumbai Veteran Nyelai Pendiau (VKU) sepenyampau RM500 seiku.
Bantu nya entara insiatif perintah dikena ngenang pengawa kaban veteran lebuh sida ti meri servis ngetanka pengelantang menua.
Presiden PVTMS Thomas Ling Kui Eng madah, bantu tu iya nya asil ari duit pupu Kimpin ‘Tabung Pahlawan’ (KTP) taun 2016.
Kelimpah ari nya, PVTMS mega udah nyuaka chek bantu ngagai empat kaban di Zon Sibu iya nya Abdullah Bus, Jugah Umpi, Lebak Gasan enggau John Lawang.
Sama bisi iya nya Sekretari PVTMS Suhaimi Abd Rashid, Tukang Wang Mohd Bakri Moh Yusof sereta Komiti PVTMS Jambari.
Lebuh bejaku maya atur pengawa nya, Thomas madah gerempung nya enda kala ngelengkaka kaban sida ti endang naka ulih gawa ungkup pemaik gerempung.
Ba taun tu ku iya, bisi tujuh iku raban gerempung entara nya luyar penyanding penemu, komiti enggau staf sida udah diberika ‘Darjah Kebesaran Persekutuan enggau Nengeri’.
Sida ke udah nerima gelar tu iya nya Mohd Bakri Mohd Yusof (Bintang Ahli Mangku Negara) Huang Lung Ong (Ahli Bintang Sarawak) sereta Bantan Badang, Damat Ijau, Dominic Assang Subin, Othman Suhaili enggau Sandra Manggie ke udah nerima gelar Bentara Bintang Sarawak.
“Gerempung deka terus nganjung nama chalun ke deka diberi gelar Darjah Kebesaran, Bintang enggau Pingat ba taun ti deka datai kelai ngenang sereta servis veteran ngagai menua,” ku iya nambah.
Ba kenang ke bukai, gerempung deka ngaga Pengerami Ngemun Kimpin ‘Tabung Pahlawan’ Renggat Nengeri Sarawak 2017 di Pasar Sentral Sibu kena 7 Oktober tu ila, pukul 9 pagi.
Pengerami deka dipenyadi Kaban Kunsil Nengeri (ADUN) Dudong ke mega Chairman Kaunsil Mengeri Sibu Datuk Tiong Thai King.
Beserimbai enggau nya, Thomas ngelalau semua kaban gerempung ngambika sama datai bebala mayuh ngulu pengerami nya kelai sukung ngagai aktiviti ke digaga gerempung tu.