BINTULU: Wang Turu Pelajar Tinggi Nasional (PTPTN) enda patut dikumbai semina ejensi nyali duit enggau palan ngumpul utang aja tang mega patut dipeda nyadika wang turu pelajar ungkup rayat di menua tu.
Menteri di Opis Kepala Menteri (Integriti enggau Ombudsman) Datuk Talip Zulpilip madah, tanggungpengawa PTPTN patut dipeda nyadi palan wang turu pelajar nengah Skim Simpanan Pendidikan Nasional iya nya SSPN-i enggau SSPN-i Plus.
Ku iya, pengeransing PTPTN ti deka mai ubah dalam runding komuniti di Malaysia ngambika nyimpan ba wang turu pelajar iya nya seiti pengawa ti manah sereta patut diterima manah semua serak komuniti di Malaysia.
“Pengudah nyauka 20 taun, pengawa ngaga transformasyen PTPTN nyadi Wang Turu Pelajar deka diteruska enggau langkar dalam Pelin Pemansang Pelajar Malaysia 2015-2025 (Pelajar Tinggi) tauka PPPMPT ari baruh langkar ti kelima enggau batang tuju nyamin penegap pekara wang ungkup sistem pelajar tinggi di Malaysia,” ku iya.
Iya madah munyi nya lebuh ti bejaku ba Pengerami Nyuaka Bantu ngagai Nembiak Primari Satu 2017 sitak Kunsil Nengeri (DUN) Jepak ke diatur PTPTN begulai enggau Opis Kepala Menteri Sarawak, Opis Pelajar Pelilih enggau ejensi bukai di Balai Sekula Primari (SK) Kampung Jepak bedau lama.
Iya ke mega Kaban Kunsil Nengeri (ADUN) Jepak madah duit simpan SSPN-i enggau SSPN-i Plus ulih mai pemaik ngagai sida ti nyimpan nengah akaun nya laban ari tetiap RM50 ke di simpan deka terus meri peluang ngagai sida nyereta pengawa nyabut perais ke nyediaka mata duit sepenyampau RM500,000 ungkup 2,500 iku pemenang.
“Nyentuk 31 Julai 2017, bisi tiga juta akaun udah dibuka lalu aktif enggau penyampau deposit nyimpan iya nya RM2.89 bilion.
“Lalu ungkup Sarawak, nyentuk 31 Julai 2017 bisi 156,520 akaun dibuka enggau penyampau deposit iya nya RM165.68 juta,” ku iya.
Ku iya nandu, lebuh pengawa bejuraika Bajet Menua 2017 kena 21 Oktober 2016 udah madahka iya nya perintah nyediaka pemeri Insentif Khas Geran Sepadan ungkup nembiak Primari Satu sekula bantu penuh perintah.
“Reti nya berengkah ari 1 Januari 2017, apai indai ke muka akaun ungkup anak sida ke mega nembiak sekula Primari Satu ba sekula bantu penuh perintah deka nerima Insentif Khas Sepadan tu, semina nengah deposit RM50,” ku iya.