Anda di sini

Kuasa karan HEP Bakun enda dijual ke Semenanjung

Advertisement
ABANG JOHARI
ABANG JOHARI

KUCHING: Perintah nengeri nadai pengingin ati deka nyual kuasa karan ari Tekad Hidroelektrik (HEP) Bakun ngagai menua Semenanjung Malaysia.

Kepala Menteri, Datuk Patinggi Abang Johari Tun Openg madahka, kuasa karan nya semina ungkup nengeri tu sereta semina deka dijual ngagai menua ke sama dalam pulau Borneo.

“Nadai. Laban kitai begunaka kuasa karan nya ungkup kitai empu. Ari segi polisi, aku udah ngemutuska kitai dekaka semua kuasa karan nya diempu kitai (Sarawak).

“Lalu engka kitai semina nyual ngagai menua ke beserimbai enggau kitai. Diatu kitai nyual ngagai Kalimatan Barat.

“Tang kitai nadai pengingin deka ngaga tauka nyambung kabel baruh tasik ke Semenanjung, ungkus kelalu mar sereta bisi risiko pantis ke tinggi,” ku iya

Abang Johari ti mega Menteri Wang enggau Perambu Ekonomi mansutka pekara nya lebuh ditanya pengarang berita sekalika bisi juluk deka nyual kuasa karan ngagai Semenanjung Malaysia ngena chara nyambung kabel baruh tasik, ba sebengkah aum pengarang berita ke diatur ba opis iya di Wisma Bapa Malaysia ditu, kemari.

Diatu, Perintah Sarawak udah ngempu semua ekuiti Sarawak Hidro Sdn Bhd (SHSB), pengempu enggau operator HEP Bakun ari perintah besai.

Kompeni ke diempu perintah nengeri, Sarawak Energy Berhad (SEB) deka bejalaika pengawa HEP Bakun ti berega RM2.5 bilion.

HEP Bakun beoperasyen magang dalam bulan Julai 2014 enggau kapasiti 2,400MW.

Nitih ku Abang Johari, pengawa ngadu ke diatu agi dipejalaika perintah besai iya nya agi ngena menijar besai sida lalu enti udah diserah enggau rasmi, Ketuai Pemesai Eksekutif nya ila, ari Sarawak tu empu.

“Diatu Bakun nya endang udah diempu Sarawak.

“Kitai bisi ngangauka Menteri Besai bejadi pengawa nyerahka nya ngena chara rasmi tang diatu nya endang amat udah diempu kitai,” ku iya ti nadai madah silik kemaya pengawa rasmi nya deka diatur.

  • oleh
  • Advertisement