SIBU: Sapit Kepala Menteri Sarawak Datuk Amar Awang Tengah Ali Hassan ensanus nangkan sida ke bekaul ngambi nagih hak tanah adat bumiputera (NCR) nitihka pematut sereta bepelasarka bukti ke betul dikena nyeliahka penyarut.
Iya madah kelimpah ngelubahka proses nyukat tanah nya, ulah ti nadai bukti ke betul mega ulih ngerampit hak orang bukai.
“Ba sesebengkah sitak, di rumah panjai (ambika banding) nyema sebengkah raban deka ngambu hak ke mayuh, baka ni (mih) hak orang bukai,” ku iya rambau bejadika Pengawa Nyuaka Gazet Rizab Komunal Bumiputera Betanam Betupi) Seksyen 6 Kanun Tanah Negeri enggau Chek Pampas Tanah di Dewan Suarah ditu, ensanus.
Berebak enggau nya, Awang Tengah ke mega Menteri Pemansang Mengeri enggau Pengeraja Asal, sereta Menteri Pemansang Industri enggau Pengawa Dagang Sarawak, madah perintah nengeri komited bejalaika pengawa nyukat tanah NCR.
Naka 31 Julai tu tadi, bisi 500 sitak ke mungkur 786,293 hektar udah mujur disukat kelingi enggau 409 sitak mungkur 627,796 hektar udah digazet. “Gazet tu bukti perintah seruran ngaku tanah NCR dipenggi rayat. Nitihku dokumen pala tanah enggau adan ke nyemetak, laya entara orang ke menggi tanah NCR ulih diseliah,” ku iya.
Pengudah nerima gazet rizab komunal Seksyen 6 nya, raban orang ke menggi tanah ulih ngaga peminta nyukat tanah kediri nitihka Seksyen 6 Kanun Tanah Negeri.
“Nyema sida ke bekaul deka tanah sida disukat kediri, kitai sigi deka ngaga tang nya meseti bepelasarka peminta sida ke bekaul,”ku tandu Awang Tengah.
Ba pengawa nya, bisi 87 pemenggi tanah nerima pampas penyampau lebih RM10 juta ungkup tanah alai ngagai Sekula Primari enggau Sekula Sekondari Permai ke mungkur 17.85 hektar.
Bisi tiga iku pemenggi tanah nerima pampas lebih RM133,000 pengudah tanah sida diambi kena ngaga Balai Bomba enggau Penyah Penusah Selangau ke mungkur 1.46 hektar. Ungkup tanah pemesai 4.24 hektar ke deka alai ngaga Sekula Primari Dudong, lapan iku pemenggi tanah udah dibayar pampas ke manggai lebih RM1.7 juta.
Tujuh iku pemenggi tanah dibayar pampas manggai RM1.16 juta ke mungkur pemesai 0.4554 hektar dikena ngagai substesyen elektrik 33/11KV di Ulu Sungai Merah.
Berebak enggau nya, bisi 82 iku ari sitak Igu enggau Batu 36 di Tamin, Stapang, Sekuau sereta Sungai Sebindang nerima gazet rizab komunal bumiputera Seksyen 6 Kanun Tanah Negeri ungkup pengawa nya. — Bernama