Dikena mansik sereta nambahka penemu ti ulih ngurangka kes sakit mental di Malaysia
KUCHING: Perintah udah nambahka lima peratus bajet ungkup Opis Menteri Pengelantang Pendiau Komuniti, Orang Indu, Pemansang Ruang Bilik enggau Anak Mit (KKWPK) ngambika ulih dikena mansik sereta nambahka penemu pasal penanggul bekaul ‘sakit mental’ ke majak mayuh nyadi ba komuniti di menua tu, pia ku Kepala Menteri Datuk Amar Abang Johari Tun Openg.
“Kitai enda tau enda ngemeratka pekara tu sereta meri penyedar ngagai mensia mayuh pasal pengerai mental kitai, laban kitai meseti nemu bakani deka ngatur pendiau pengidup kitai sereta mutarka sebarang penanggul ti ditapi, laban siti ari penanggul ke pengabis besai ti suah nuntung rayat kemaya hari tu iya nya penyuntuk belanja,” ku Abang Johari.
Iya madah munyi nya lebuh bejaku bejadika atur pengawa ‘29th World Congress of the International Association for Suicide Prevention (IASP) and the 21st Malaysian Conference of Psychological Medicine (MCPM)’ ti digaga berengkah ari 18 nyentuk 22 Julai tu. Aum tu udah matak lebih 500 penyereta ari serata dunya, di Palan Konvensyen Borneo Kuching (BCCK) ditu, kilah ensana.
Iya madah, lebih ari 800,000,000 iku mensia mayuh parai ketegal munuh diri ninting taun lalu nitih ku penerang ari kaban belayan serta bakih sida ti munuh diri tu ketegal penanggul suntuk belanja.
“Di Sarawak, surat berita di menua tu seruran nabur berita pasal kes munuh diri lalu tu nyadi pengirau ati mensia mayuh beratika penanggul bansa nya, lalu ketegal nya penanggul bansa tu enda tau enda diputarka enggau cheremat,” ku iya.
Abang Johari ti mega nyadi Menteri Wang enggau Perambu Ekonomi madahka, kes bekaul munuh diri tu suah diayanka ba surat berita lalu sida ti napi penyakit tu deka dipeda baka tusah ati (depression), rawan ati, gian arak enggau dadah ti ngujungka sida munuh diri.
Iya nandu baru madahka bacha pansik ari rikod Pengerai Nasional mandangka urung 30 peratus ari rayat kitai napi penanggul pengerai mental.
Ku iya, Konferen Psikologi Malaysia meransang kitai beratika kes pengerai mentai ke nyadi dalam komuniti kitai, lalu nyendiaka ubat tauka ngaga peresa pengerai mental ari pun.
“Aku ngarapka komuniti kitai ke bisi napi penyakit bansa tu, tauka orang ke ngibun sida iya, betatika lalau tu enggau jampat lalu beperesa sereta berubat.
“Baka di sekula, pengajar muntang agi ngelala nembiak sida ke bisi napi penyakit bansa tu,” ku iya.
Kelimpah ari penusah ke ditapi, iya madah, penyakit mental mega tau nekul pengawa rama sereta produktiviti kitai.
“Penyakit mental ukai semina ngasuh kitai napi penusah ati, tang tau mai pengerugi ngagai ekonomi menua.
“Nya alai, aku betatika pemisi program ke baka tu, ulih kena ngemanahka agi pengerai mental komuniti kitai, lalu ngurangka kes munuh diri.
“Lalu tu nyengkaum meri ungkup bajet ungkup ngelaku semua program pengerai mental, digaga ba sida nembiak sekula, ngambika sida nemu reti sereta nyeliahka sida ari penyakit mental,” ku iya.
Ba lansa bukai, Abang Johari ti mega nyadi Menteri Pemansang Mengeri madahka pengirau ati laban entara kebuah kes munuh diri ba nembiak sekula iya nya ketegal kes ‘buli’ ke balat endar nyadi diatu.
“Aku irau endar ati beratika pekara tu, kelebih agi bedau entu lama, mayuh endar ripot pasal kes ‘buli’ ke ngujungka orang nya parai.
“Kelimpah ari nya, bisi mega kitai beratika apai indai ti kelalu ngarapka anak sida nyapai pemutus peresa ke nyulut, tang peminta apai indai ti bansa nya ulih ngujungka anak sida suntuk runding ke tau mai penanggul bukai,” ku iya, lalu nandu baru ngelalau apai indai anang kelalu mejal anak sida.
Kelimpah ari nya, Abang Johari madahka perintah mega minta bantu raban akademik sereta profesional ngaga mayuh agi pansik bekaul runding tauka pengingin deka munuh diri ke nyadi di Sarawak, ngambika nemu ni tikas penyakit tu nyadi ditu.
“Ari pansik nya, kitai nemu bakani chara kitai mutarka penanggul ke bansa tu, sereta ulih mantu sida ke napi penanggul tu,” ku iya.
Sama bisi enggau ngulu atur pengawa nya kemari, raban speaker ke kongres tu, pengari Gerempung Pengerai Dunya (WHO) Dr Shekhar Saxena, presiden Malaysian Psychiatry Association (MPA) Prof Nor Zuraida Zainal, presiden International Association of Suicide Prevention (IASP) Prof Ella Arensman enggau Konsultan Psychatrist ari Universiti Kebangsaan Malaysia (UKM) Professor T. Maniam.