Anang pechaya ngagai jaku umbuk piak ti bedanji deka meri perais ngagai kita, mesej baka nya tau dipadam
SIBU: Mensia mayuh ditu dilalau anang kelalu pechaya ngagai jaku umbuk sekeda piak ti bisi bedanji deka meri sebarang perais ngagai sida.
Tu beduduk ari mayuh kes nipu nengah chara ‘online’ lalu sida (penguna tauka mensia mayuh) patut nyeliah diri ari alah kena tipu, ku Ketuai Polis Pelilih Sibu, Saiful Bahri Abdullah.
Ku iya, pekara tu suah amat dipadah ngagai mensia mayuh tang agi bisi sida kena tipu orang ti nadai dikelala.
“Aku alit ati berati agi bisi ga kena tipu taja pan polis udah suah meri lalau ngagai mensia mayuh,” ku iya madah ba sebengkah randau enggau raban media ditu lemai Hari Tiga tu tadi.
Saiful madah, nyema komuniti empu nadai nguji ngemaduka ulah nipu, nyadi penyampau kes deka majak nambah.
Nitih ku iya, tebal agi jalai pengawa nipu chara ‘online’ endang sebaka.
Ku iya, sida bepun bekelala nengah Facebook lalu udah nya sida madah ngagai orang deka nganjung perais tang proses nya bisi penanggul laban perais ditan piak Kastam.
Udah nya, orang ke deka diperais tu dipinta mayar duit ngambika perais nya ulih diambi.
“Selalu iya, pengawa nipu bepun enggau nganjung mesej ngena jaku ke bebungai dalam jaku English nuju orang ke beempu akaun Facebook ke udah dipilih,” ku Saiful.
Pengudah lama berandau, jaku English ke diguna nyau majak enda berurun sereta ngena atur sepil ke salah.
“Nyema bisi mesej datai deka meri perais dalam Facebook kita, manah agi anang peduli tauka padamka terus suis komputer,” ku iya.
Iya mega madah pekara nya semina ngerugika sida (orang ke ditipu), udah kena tipu baru deka ngaga ripot polis.