Anda di sini

Media, pengari rayat sebaka tanggungpengawa

Advertisement

Pengemeran media mantu mantaika polisi perintah, sebana rayat sereta nerang pekara ke amat

 Abdullah betabi enggau bala pesereta ari tetiap unit ke muka bansal ‘Gawai Raya’.
NGABANG: Abdullah betabi enggau bala pesereta ari tetiap unit ke muka bansal ‘Gawai Raya’.

KUCHING: Menteri Muda ba Opis Kepala Menteri (Pekara Korporat), Abdullah Saidol madah sereta nyemaka ke pengemeran media baka pengari rayat, ti mantu mantaika polisi perintah sereta sebana rayat.

Iya madahka pengemeran tauka raban media mega betapi enggau mayuh pemar baka deka nerangka pekara ti amat tang bisi mega anggap sekeda orang penerang nya enda betul.

Aku patut bebasa sereta beterima kasih ngagai raban media ti berani madahka pekara ti amat, nyemelaka entara peneka tauka agenda perintah lalu berebak enggau nya kita (media) mega deka mantu ngenataika peneka, pengingin enggau pengirau rayat.

Taja aku dipilih nyadi pengari rayat nengah pengawa bepilih, kita media mega dianggap aku nyadi pengari rayat, pia mega raban pengajar, orang berikan, orang bumai bekebun enggau ke bukai endang bisi tanggungpengawa sereta pemar ke ditapi.

Nya alai enda ngira kaban politik tauka pengari rayat nyema bisi ripot media ke nyima ati, ba penemu aku nya ukai salah kita (media), nya pengilap pengari rayat ke enda gawa,” ku iya.

Abdullah ti mega Kaban Kunsil Nengeri (ADUN) Semop mansutka pekara nya lebuh bejaku ba Pengerami Gempuru Ninting Bulan & Pengerami ‘Gawai Raya’ RTM Kuching 2017, ke diatur ba Gelanggang Badminton RTM ditu, kemari.

Aku berani bejaku munyi nya, aku empu pan pengari rayat,” ku iya seraya meransang media ngambika bejalaika pengawa enggau manah.

Nambahka nya iya mega mega ngarapka orang ke deka nyadi orang politik enda patut ngembuan ulah ti kelalu besai ati tauka tinggi jaku laban nya ulih ngasuh rayat nadai pengerindu.

Aku ukai asal orang politik nya kebuah aku berani madah baka nya lalu enda ngira sapa orang politik ke bisi asai kena sindir, aku berani betunga mua lalu anang bejaku ari belakang aku,” ku iya.

Kelimpah ari nya Abdullah lebuh ke ngenang pasal dua pengerami nya ‘Gawai Raya’, iya ngarapka penegap runding deka beserakup sereta rinduka pangan diri terus dikemeranka tiap hari, ukai semina maya bisi pengerami.

Penegap runding nya patut dipajakka tiap hari lebih agi di Sarawak sereta di mengeri penyerakup iya nya Kuching,” ku iya.

Ba pengerami ‘Gawai Raya’ nya kemari bisi 11 bansal pemakai ari 11 unit dalam RTM bisi nyendiaka mayuh macham pemakai, kelimpah ari diatur program atas panggau.

Berebak enggau tu Abdullah diberi basa nyauka duit insentif pelajar ngagai bala anak pengereja pengawa opis RTM ke nyulut ba peresa perintah taun nyin kemari, kelimpah ari ngerami hari pengada pengereja pengawa opis nya ke ada dalam bulan Julai.

Sama bisi ba pengerami nya kemari Sapit Direktor Rangkaian dan Pemancaran TV, Jamel Seman sereta Ketuai Penulung Direktor Seksyen Radio Faridah Sulong ti bejalaika tanggungpengawa Direktor Penabur Kandang Sarawak enggau ke bukai.

  • oleh
  • Advertisement