KUCHING: Perintah patut nyerenih mayuh pekara ti tau nyadi kebuah tebal agi orang gawa perintah napi kusut runding ba endur gawa.
Tambah mega ukai semina nya aja, tu dikeirau deka ngeruga organisasyen endur gawa lalu meri pangka enda manah ngagai institusyen ruang bilik.
Nitih ku Presiden Kongres Serakup Orang Gawa Perintah (CUEPACS), Datuk Azih Muda, enda ulih dikeenggai kemaya hari tu, orang gawa perintah nyengkaum di opis menteri, opis tauka badan beruniform betapi enggau seiti tikas kusut runding ti bisi tinggi.
“Lebuh perintah ngaga pemutus badu agi nambah staf kelimpah ari bisi pemuang ketegal pinchin, nadai agi pengawa ngambi baru, nya alai tating kereja majak nambah lalu lebuh tating kereja betambah, ke alai jam ke bisi iya nya lapan jam enda chukup, ngujungka kereja ngelui ari jam gawa.
“Maya kereja ngelui ari jam gawa, bisi mayuh ejensi perintah enda mayar gaji ba jam lebih gawa, bisi mega semina dibayar setengah aja, bisi semina 3 per 4, bisi nya semina 1 per 3 lalu bisi mega semina diberi kemisi ganti.
“Tu sekeda pun pekara ti ngasuh kusut runding ngagai orang gawa perintah,” ku iya rambau aum pengarang berita pengudah bejadika Bengkel Pengelikun enggau Pengerai Orang Gawa Perintah 2017 diatur Opis Pengelikun enggau Pengerai Pekereja (JKKP) Sarawak bepalan ba sebengkah hotel tebilang ditu, apin lama ke udah.
Ku Azih nerang baru, orang gawa perintah betapi enggau kereja lebih ari dua syif mega sekeda ari sida ti deka ditepan penanggul kusut runding endur gawa lalu tu ngujungka institusyen ruang bilik runtuh.
Bechuntoka syif ngagai orang gawa perintah ti gawa di sepital, bisi sekeda sida dataika dua hari enda pulaika rumah ketegal pinta ba pengawa.
“Kereja dataika tiga syif, dua hari enda pulaika rumah, enda mandi lalu enda tegantika gari lalu tu ngujungka penanggul baru nyadi dalam rumah tangga dataika laki tauka bini sida lenyau pengarap ngagai laki tauka bini diri lalu tu tau ngasuh sida sarak, semina ketegal polisi kereja ngelui ari tiga syif,” ku iya nerang.
Ba lansa bekaul, Azih madahka CUEPACS deka minta perintah mulaika baru pinchin orang gawa perintah ti pinchin manggai umur 55 taun.
Ku iya, pengawa mulaika baru meri pinchin nitihka umur pinchin nya ila, ke alai nadai agi sekat ti digaga sebedau 1991 tauka pengudah 1991 ti madahka pinchin 55 taun semina deka nerima duit pinchin lebuh manggai umur 60 taun.
“Diatu umur 55 taun pinchin, bayar pinchin terus, enda ibuh nganti manggai 60 taun, pinchin patut dibayar terus, anang ngikat sida (pinchin), laban sida udah pinchin tang apin nerima pinchin diri, lalu tu mega tau ngasuh kusut runding.
“Kitai pechaya, nyema raban pinchin tu nerima pinchin sida lalu semua perengka guna ungkup raban pinchin pengudah sida pinchin lalu enda ibuh nganti manggai umur 60 taun, tu deka meri pengelantang ngagai sida,” ku iya nerang.