KUCHING: Perintah Menua Sarawak nengah Komiti Ngemutarka Penusah Ngenyit Sarawak deka baum ngemutarka penanggul penyakit ukui gila (Rabies) enggau Perintah Republik Indonesia nengah Opis Konsulat Republik Indonesia, Kuching, pagila.
Kepala Menteri Datuk Amar Abang Johari madah komiti nya betuaika chairman Komiti Ngemutarka Penusah Ngenyit Sarawak ti mega nyadi Sapit Kepala Menteri, Datuk Amar Douglas Uggah anak Embas enggau Menteri Opis Kandang Menua enggau Pengawa Berumah, Datuk Dr. Sim Kui Hian deka baum enggau Konsulat Indonesia, Jahar Gultom, ditu, pagila.
"Uggah enggau komiti iya deka baum sereta bejuraika penanggul nya sereta ngiga chara ngemunaska penyakit ukui gila nya, begulai enggau Perintah Republik Indonesia.
Iya madah munyi nya lebuh bejaku ba aum media lebuh ngelawa Dewan Masyarakat Batu 10 ditu, meda raban Opis Veteriner meri tuchuk Vaksin pechuma ngagai ukui sereta mayau komuniti ke diau di kandang Batu 10.
Abang Johari lebuh ngelawa palan nya kemari, disempulang ulih Uggah enggau Dr. Sim.
Ba lansa bukai, Uggah madah entara pekara ke dijangka deka dipejuraika, kelimpah ari bekunsi penemu, iya nya ngaga 'Buffer Zone' .
"Reti nya, kededua buah menua (Sarawak enggau Indonesia) deka bekunsika pemadah nyema enti bisi pemansang bekait enggau Rabies, laban tumu agi penyakit nya bisi ditemu, tumu agi kitai deka ngemunaska penyakit nya ngerampit kitu," ku Uggah.
Iya nandu baru, madahka nyema abis aum komiti enggau Konsulat Republik Indonesia nya, perambu bukai ke disadangka, iya nya nuchuk vaksin ngagai ukui ke ditemu ba garis menua entara Sarawak enggau Indonesia.
"Tu entara sadang kami tang anti dulu meh ari asil aum nya pagila, laban perambu kami deka nuchuk vaksin ngagai ukui tauka jelu bukai ke ditemu di garis menua entara Sarawak enggau Indonesia," ku iya.
Ba program nya kemari, dipelabaka lebih seribu iku mensia mayuh kediau dalam kandang Batu 10 mai jelu ke di intu sida iya ngagai dewan nya, ngulihka betuchuk vaksin pechuma ke bisi disediaka ulih Opis Veteriner.
Kelimpah ari nya, Uggah madahka Batu 10 dipilih endur jelu betuchuk vaksin, ngambika sitak nya sereta Batu 7 nyadi 'Buffer Zone' napi Rabies ari ngerampit di mengeri tu.
Naka kediatu, sitak Siburan dikelai nyadi sitak ke ditemu bisi seiku ukui positif kena Rabies, tang ukui nya diatu udah dituchuk mati.
"Sitak Siburan napi positif Rabies laban sitak nya semak enggau pelilih menua Serian ke napi penyakit Rabies.
"Seagi-agi sitak besemak endur ke kena tinggang tasah tauka dalam radius 10km, kitai enda tau enda ngaga 'buffer zone'.
