Dikena negutka kaul entara rayat pupu bansa seraya nentuka pengelikun, penyerakup seruran dikemeran
SEMOP: Menteri Muda Korporat Abdullah Saidol mai rayat pupu bansa begulai berami ngintu hari besai sida seraya negutka agi kaul enggau pangan diri dikena nentuka pengelikun penyerakup ti endang dikembuan ngelama tu.
Ku iya, ulah tu tau bendar nyeliahka peragam ati ke enda manah ngagai pangan diri ti tau bendar mambarka penyerakup.
“Maya kitai ke berami baka ngintu Hari Gawai, nadai salah kitai ngena awak nya ngeringka agi pengelikun ke dikembuan rayat pupu raban bansa ba nengeri tu,” pia ku iya maya nemuai Mantar Gawai Dayak ba Kunsil Nengeri (DUN) Semop, empai lama tu tadi.
Maya ke ngabang tu, Kaban Kunsil Nengeri (ADUN) Semop nya bela ngena awak nya nerangka pemesai reti tanggungpengawa tuai raban bansa enggau bala tuai rumah ti nyadi pelasar perintah ngemujurka pelin pemansang menua.
“Perintah randaka tuai raban bansa enggau tuai rumah lebih agi baka di DUN Semop semampai chakah bejalai betemu enggau rayat ngambika nemu nama penanggul ke ditapi rayat mayuh.
“Seraya nya, sida mega mega megai tanggungpengawa nerangka pelin pemansang menua ngagai rayat ba endur ke dipegai diri empu.
“Ngambika semua nemu, perintah pechayaka raban tu lalu kitai ngarap rayat ulih bebasa ngagai sida sereta meri kerejasama ti chukup ngambika pulaika penguntung enggau pengelantang ngagai diri empu,” ku iya madah baru.
Ketegal nya, Abdullah besemaya deka ngatur randau begulai enggau raban tu dikena ngeringka agi pengawa sida ngagai rayat.
Berebak enggau tu mega, iya meri besai terima kasih ngagai raban bansa Iban di DUN Semop ti enda belampung ati nyukung iya ngelama tu bejalaika pengawa nyadi pengari rayat ba DUN nya.
“Aku enda ulih besemaya meri kita bintang enggau bulan tang aku ulih besemaya deka gawa bebendar sereta berani ngintu kita rayat ditu,” pia ku iya.
Ba pengerami tu, Abdullah enda kala enda ingat ngelalau bala apai indai ngambika ransing besimpanka belanja dikena nyengulaka anak.
“Kitai enggai meda nembiak enda besekula laban ke suntuk belanja.
“Semua kitai meseti nemu pemujur ba pelajar nentuka pengidup ti meruan dudi hari,” ku lalau iya.
Pengawa Abdullah ti ngabang sebedau tauka udah Gawai Dayak endang dikereja iya ninting taun.
Taun tu, taja jam iya suntuk diumbaka baru udah dipadu ngadi Menteri Muda Korporat kelimpah baru tembu ngulu Aum Kunsil Nengeri, dalam kandang tiga hari iya mujur ngabang ngagai 35 buah rumah panjai di Kelai, Bakerkong, Sibu Tanjung Manis, Mupong, Teluk Gelam, Semaring enggau Sungai Selidap berengkah 24 nyentuk 26 Mei tu tadi.
Taja pan baka nya, iya ti disempulang bini iya Norasyikin Ibrahim ngetu dulu ngabang ketegal Ramadan sebedau nandu pengawa seduai ngabang ngagai Berangan, Paloh enggau Sungai Sian kena 10 Julai ila.
Maya ke ngabang taun tu, iya bisi nyuaka saup RM80,000 ngagai semua Komiti Pengelikun enggau Pemansang Genturung Pendiau (JKKK) Rumah Panjai di DUN N.42 Semop.
Kelimpah ari nya, iya mega nyuaka pemeri RM60,000 dikena ngaduka baru pendai rumah panjai ke udah lama ba DUN nya.
Abdullah bela ngerichah agi mantar Gawai Dayak taun tu enggau macham bengkah program merindang ari artis Iban tebilang kelimpah tikit benasit.