KUCHING: Akademi Serakup Dayak Iban (ASADIA) ngarapka bunyi tabuh iya nya sebengkah main asal bansa kitai di nengeri tu ulih disebakaka.
Kebuah pia ku Ketuai ASADIA Mabong Unggang, laban ke diatu bunyi tabuh kitai di nengeri tu enda sebaka sereta nitihka menua.
“Betabuh tu endang sebengkah main asal ke chukup pegari ba bansa kitai Iban.
“Taja pan bunyi tabuh ti enda sebaka tauka nyelai ari sesebengkah menua tang tu udah mandangka kitai Iban endang lama udah landik nempa tauka nengkebang main asal bepelasarka bunyi tauka muzik.
“Aku amat ngarapka jemah ila kitai Iban di Sarawak ulih nerima bunyi tabuh ke sebaka di serata Pulau Borneo, dikena ngangkatka agi main asal sereta bunyi tabuh nya ulih dikena ngelai enggi menua Sarawak,” ku iya.
Nambahka nya lebuh ke bejaku ngagai Utusan Borneo, Mabong madahka ASADIA deka majak chakah ngangkatka main asal Iban nengah chara ngatur kelas betabuh ti keenam sereta ti keterubah ba RPR Landeh ditu.
Ku iya, nya sebengkah ari chara dikena ngetanka main asal Iban kelimpah ari juluk deka ngerembaika ngagai rebak baru enggau dudi.
“Aku ngarapka mayuh agi bala nembiak rebak baru belajarka tabuh ngambika bisi ngetan sereta nampung main asal bansa kitai Iban, ke endang nyadi juluk kami ngatur kelas main asal,” ku iya.
Kelas belajar betaboh ti keterubah ba RPR Landeh nya deka diajar seiku orang ke endang landik ba muzik asal kitai iya nya John Nuga, ti mega landik ngajar gendang Iban.