KUCHING: Sabah enggau Sarawak patut bisi stesyen televisyen (tv) kediri empu, lalu batang berita ke dibantaika penuh pasal kededua nengeri tu.
Tu seiti ari beratus penemu ke dibantaika penguna laman sosial Facebook bekaul enggau pengerami Gawai Dayal ti kurang dikelaku tauka dipandangka ba stesyen TV menua tu.
Penemu nya mega nerima sukung ari penguna bukai ke deka Sarawak numbuhka stesyen tv kediri empu ngambika enda bepanggai ba stesyen tv ti bepalan di Semenanjung Malaysia.
Nambahka nya penguna Facebook, enti bisi stesyen tv ke didiempu penuh Nengeri Sarawak, nya mega deka meri peluang gawa ngagai rayat nengeri tu sereta mantaika pengelandik seni peranak nengeri tu.
Kelimpah ari nya, nya mega ulih mandangka program bekaul enggau penyelai ke dikembuan nengeri tu baka pengerami, produk asal enggau ke bukai.
Sapit Kepala Menteri Datuk Amar Douglas Uggah Embas ba aum pengarang berita Hari Lima tu tadi, deka meda mayuh agi promosi pasal pengerami tu diayanka ba stesen tv perintah enggau peribit.
Iya mega enda nyangkal, ke alai promosyen tauka iklan meri Selamat Hari Gawai kurang enti dibandingka enggau pengerami bukai di menua tu, taja pan raban bansa Dayak ulih ditemu ba serata menua.
Nya alai, iya ngarapka mayuh agi piak kelebih agi pengempu stesyen tv perintah enggau peribit bejalaika tangungpengawa sida dalam pekara tu.
Sebedau tu, Parti Bansa Dayak Sarawak Baru (PBDSB) dulu mantaika pekara tu pengudah enda lantang ati enggau pekara nya ti ngayanka pengerami Hari Gawai enda diaku di Malaysia.
“Sarawak amat bebendar ngelakuka industi dagang temuai tang nama kebuah pemerat tauka perati enda sama diberi ngagai pengerami Gawai ti mega ngembuan rega dagang temuai ke tinggi,” ku PBDSB nengah ba sebengkah penerang berita.