KUCHING: Minta diperati sereta dikemeratka perintah bekaul enggau projek ngaga baru sekula SK Nanga Musah di Song ke udah lama tejanggal tauka lalu bedau berengkah dipejalaika.
Nitihku Paren Nyawi Pemantu Khas Kaban Parlimen Sibu, sekula nya ditutup kenyau ari taun 2001 berindik ari begunan sekula nya udah ke lalu tuai, iya nya digaga dalam taun 1963, tanah tusur enggau ke bukai.
Ku iya berindik ari sekula SK Nanga Musah ditutup, nembiak sekula nya dipindah ngagai SK Nanga Nyimoh di Sungai Katibas, iya nya urung sejam pejalai ngena perau ari Sungai Musah ke Nanga Nyimoh.
“Pengudah SK Nanga Musah ditutup dalam taun 2001, perintah kala baum enggau Tuai Rumah ke bekaul sereta madahka deka ngaga SK Nanga Musah ba palan baru iya nya ba tisi Jalai Nanga Banjor.
“Palan nya udah ditemu endur tang nyentuk ke sehari tu projek sekula baru SK Nanga Musah bedau berengkah taja pan udah 16 taun lebih.
“Nyentuk ke diatu, apai indai nganjung anak sida ngagai Nanga Nyimoh ngena perau laban nadai jalai ke nyambung ari Sungai Musah ngagai Nanga Nyimoh, iya nya palan sementara SK Nanga Musah kenyau 16 taun ke udah,” ku iya.
Nitih ku Paren madah ngagai Utusan Borneo, Sungai Musah bisi 10 buah rumah panjai iya nya Rh Japok Ribai, Nanga Senyaru; Rh Ajan Gait, Nanga Musah; Rh Philip Geliga, Lubok Subong; Rh Dampol Kanin, Nanga Pasi; Rh Bagan Jugam, Nanga Tenganggai; Rh Tugang Bati, Emperan Kasai; Rh Baro Mawa, Nanga Semulong, Batu Ensulit; Rh Demang Rebai, Emperan Menuang; Rh Joslee Unchat, Nanga Matalau enggau Rh Sanda Tading, Nanga Setapang, Ulu Musah.
“Semina dua buah rumah panjai ke udah datai jalai alun iya nya Nanga Senyaru (Jalai Song-Nanga Banjor) enggau Nanga Matalau (Jalai kompeni kayu), lalu lapan buah rumah panjai ke bukai agi ngena jalai sungai.
“Kenyau SK Nanga Musah ditutup, peranak ba menua nya majak kurang laban mayuh ke udah bepindah ngagai kandang menua ke semak enggau pasar Song laban deka nyengulaka anak sida,” ku iya.