KUCHING: Opis Menteri Dagang Dalam Nengeri, Koperasi enggau Pekara Bebeli Barang (KPDNKK) ngarapka ‘zero’ tauka nadai ngerikod sebarang penyalah tauka kes sekumbang Skim Kawalan Harga Musim Perayaan Hari Gawai 2017 dipejalaika.
Sapit Menteri KPDNKK, Datuk Henry Sum Agong madah, berindik ari pekara nya dikearapka orang dagang di menua ulih nitihka skim ke udah ditetapka di baruh Akta Kawalan Harga dan Antipencatutan 2011.
Orang dagang enda tau enda nyual barang ke dijaga perintah enda lebih ari rega maksimum ke udah ditentuka perintah sereta patut ngayan tauka ngelekatka kelai rega barang bechura kalas ba rega ke dijaga perintah.
“Kitai (KPDNK) ngarapka musim pengerami Gawai taun tu, nadai ngerikod sebarang kes tauka ‘zero’ kes ti ngelanggar atur ke udah ditetapka.
“Laban kitai ngenusah piak ke bekaul nya, kitai nadai juluk sereta enggai pekara ti ngelanggar atur nya nyadi ba orang dagang kitai.
“Nyerumba musim pengerami Gawai taun nyin kemari, kitai (KPDNKK) di Sarawak ngerikod 8 kes (semua kes nya ketegal enda ngelekatka kelai rega bechura kalas,” ku iya.
Henry mansutka pekara nya dalam aum pengarang berita lebuh ke nemuai seraya ngabas penyukup barang ke dijaga perintah nyerumba Skim Kawalan Harga Musim Perayaan Gawai Dayak 2017, ba sebengkah palan bebeli barang ditu, kemari.
Skim Kawalan Harga Musim Perayaan Hari Gawai 2017 dipejalaika pengelama tujuh hari iya nya berengkah 27 Mei ngagai 2 Jun, ke udah dipenyadika Menteri KPDNKK Dato Seri Hamzah Zainudin kena 19 Mei tu tadi.
Berebak enggau tu Henry madahka penyampau pemesai penerit adat di serata Malaysia bisi lebih ari 2,000 iku lalu di Sarawak aja bisi lebih ari 300 iku.
Nambahka nya, iya madahka dikena mantu opis menteri nya bejalaika pengawa pematau rega barang, bisi 1,000 Pemesai Pematau Rega (PPH) kontrak ti enda ngena uniform di serata Malaysia.
“Di Sarawak aja bisi 112 PPH, sida (PPH) tu mantu opis menteri bejalaika pengawa perintah dikena ngenukuka pengelantang rayat, lalu tu ngayanka perintah chukup beratka rayat dalam kitai betapi enggau rega barang ti enda meruan.
Bisi 13 bansa barang ke dijaga perintah nyerumba pengawa ngatur Skim Kawalan Harga Musin Perayaan Gawai Dayak 2017, ti dipejalaika di baruh Akta Kawalan Harga dan Antipencatutan 2011.
“Penyalah nyual barang rega ke dijaga perintah ngelui ari rega maksimum iya nya, orang seseiku ke ngelanggar atur nya ulih diukum kort nyentuk RM100,000 tauka dijil enda lebih ari tiga taun tauka kededua nya tauka dikompaun nyentuk RM50,000.
“Kompeni ke ditemu salah nyual barang ke dijaga perintah ngelui ari ke patut ulih diukum nyentuk RM500,000 tauka dikompaun nyentuk RM250,000.
“Penyalah ke enda ngelekat tauka mandangka tanda rega bechura kalas ba barang ke dijaga perintah, iya nya orang seseiku ulih diukum kort nyentuk RM10,000 tauka kompaun nyentuk RM5,000 lalu kompeni ulih diukum nyentuk RM20,000 tauka dikompaun nyentuk RM10,000,” ku iya.
Orang mayuh ke tetemuka orang sesiku tauka kompeni ke ngelanggar akta nya patut ngeripot tauka ngenataika sebana ngagai Opis Menteri nengah lumur 03-8000 8000 1Malaysia One Call Centre; talian bebas tol 1-800-886-800; email ngagai alamat [email protected]; SMS ngagai 15888 enggau naip ‘KPDNKK ADUAN <butiran aduan>’ tauka datai ngagai enda ngira bagi opis KPDNKK di serata Sarawak, Sabah enggau Wilayah Persekutuan Labuan.
Sama bisi dalam aum pengarang berita nya kemari, Direktor Opis Dagang Dalam Nengeri, Koperasi enggau Pekara Bebeli Barang (PPDNKK) Sarawak Datuk Stanley Tan, Ketuai Penerit Adat PPDNKK Sarawak Abdul Hafiz Abdul Rahim enggau ke bukai.