Rintai nama nya ari Parti Sa’ati Rakyat Sarawak enggau Parti Rakyat Bersatu
KUCHING: Rintai nama chalun ngarika Barisan Nasional(BN) ba Pengawa Bepilih Mit (PRK) sitak Kunsil Nengeri(DUN) Pujut udah diterima Kepala Menteri Datuk Amar Abang Johari Tun Openg.
Rintai nama nya nitihka Abang Johari ari Parti Sa’ati Rakyat Sarawak (SUPP) enggau Parti Rakyat Bersatu (UPP).
“Rintai nama chalun ari kededua parti udah bisi. Enggau lurus aku madah, pengawa bepilih tu ukai pekara ke mudah ungkup Barisan.
“Tang kitai mengkang ngasai ulih menang,” ku iya lebuh dikerandau pengudah bejadi Bazaar Ramadan DBKU di Satok ditu, kemari.
Iya nambah, chalun ngarika BN deka ditemu enda lama agi ke alai mayuh nama ari SUPP enggau UPP diterima.
“Bisi maya ila aku madah, anti mih enda lama agi,” ku Abang Johari.
Penuduk DUN Pujut puang pengudah pemangku sitak nya Dr Ting Tiong Choon (DAP) diketu ari mangku pengawa nya.
Mosyen ngetuka Tiong Choon digaga kena 12 Mei tu tadi ba aum DUN pengudah ditemu ngembuan dua peranak, Malaysia enggau Australia.
Chairman Komiti Pengawa Bepilih (SPR) Datuk Seri Mohd Hashim Abdullah ba sebengkah aum pengarang berita dulu agi ari tu netapka PRK DUN Pujut deka diatur kena 4 Julai 2017.
Hashim mega madah maya ngantung nama chalun ditetap 20 Jun 2017.