Anda di sini

Kemeratka kualiti, pemeresi pemakai enggau ai ti dijual

Advertisement

KUCHING: Kepala Menteri, Datuk Amar Abang Johari Tun Openg minta orang dagang bazaar ramadan beratka kualiti enggau pemeresi pemakai enggau ai ke dijual.

Bejaku ngagai pengarang berita pengudah bejadi Bazaar Ramadan DBKU di Satok kemari, iya minta pekara nya dikemerat ungkup pemaik orang Islam ke bepuasa enggau bansa bukai ke bela bebelika pemakai.

Intu enggau manah pemeresi enggau kualiti pemakai ke dijual. Lauk (pemakai) ke udah dua hari enti ulih anang dijual agi,” ku iya.

Rega pan anang mar, ulih dibeli semua, tandu Abang Johari.

Kelimpah ari nya, iya madah mensia mayuh ke datai nedat bazaar nya, bebelika pemakai mandangka penyerakup pupu bansa di nengeri tu.

Nitihka penerang ari Abang Johari, tujuh bengkah palan di Kuching bisi numbuhka bazaar ramadan.

Semua bazaar tu bisi lisin lalu meri awak ngagai orang dagang nyual pemakai,” ku iya.

Bela datai Menteri Opis Kunsil Kandang Menua Datuk Prof Dr Sim Kui Hian, Menteri Pengintu Pengelantang, Orang Indu enggau Komuniti Datuk Fatimah Abdullah, Datuk Bandar DBKU Datuk Abang Abdul Wahap Abang Julai enggau orang bukai.

Advertisement