SIBU: Bantu ari mensia mayuh beguna bendar dikena nyaup seiku nembiak mit ke beumur lima bulan ti napi penyakit ‘hydrocephalus’ iya nya pala nembiak mit nya majak kembai.
Nembiak tu ti benama Solomon Franky begunaka bantu RM250,000 dikena iya berubat di Taiwan ngambika iya ulih gerai baka nembiak bukai.
Apai indai Solomon tu mega dipadahka bela bekenaka bantu urung RM150,000 nyadika belanja sekumbang dua bulan ngibun iya maya berubat di Taiwan.
Sinu ngenang penusah tu, Kumpulan Amal Malaysia Sibu begulai enggau Kelab Lions Sibu Mandarin diatu mujur ngiga RM400,000 ba tuju deka nyaup Solomon.
Kilah ensana, sebedau bekejang ke Taiwan, Solomon enggau indai iya Tiong Wen Fen, 27, nerima pemeri RM7,430 ari Raban Indu UPP Dudong.
Pemeri nya dipupu urung 1,000 iku raban nya ke lalu disuaka ketuai sida iya nya Kapitan Connie Loh.
“Kami ngarapka bantu tu ulih nyaup sida sebilik,” pia ku iya madah ngagai pengarang berita.
Apai Solomon, Frank Anong, 35, madah laban ke suntuk, iya madahka diri kala minta saup ari mensia mayuh.
Iya mega nadai batang pengawa ke entap lalu bini iya Tiong sebedau tu kala gawa nyadi promoter ti begaji RM2,500 sebulan tang badu gawa laban ngibun anak seduai.
Seduai melaki bini bisi empat iku anak ke bukai ti beumur tiga nyentuk 13 taun.
Kelimpah pala majak kembai, Solomon mega dipadahka pedis deka enseput.