Ngambika orang ke gawa nya dibungkur insurans ari penyampau ti dibayar ngagai opis SOCSO
KUCHING: Tetiap buah kompeni ke ngaji pekereja di Malaysia enda tau enda ngerijista pengereja pengawa sida ba Gerempung Pengelikun Rama (SOCSO) ngambika bisi dibungkur insurans ari bayar ngagai opis SOCSO nya.
Kompeni ti enda ngerejista pengereja diukum Akta 4 & 5,Gerempung Pengelikun Rama (SOCSO)
“Kompeni ke enda ngerejista pengereja pengawa sida ba SOCSO tau diukum RM10,000 ungkup siti kes tauka dijlil dua taun tauka kededua ukum nya sekali,pia ku Direktor SOCSO Sarawak”, ku Philip Sangkan.
Ngenang siti kes ke bisi nyadi bedau lama udah,ke alai seiku balu baru nemu hak iya bisi disengkaum dalam bayar penguntung ari SOCSO laki iya, taja pan laki iya udah parai 23 taun ke udah.
Taja pia, enti bisi seiku ari laki bini ke gawa nya, dalam timpuh ke gawa endang seruran bisi mayar SOCSO, tang pengudah orang nya parai sereta ngetu mayar SOCSO, ukai reti orang nya enda dibayar pampas SOCSO.
“Reti nya, balu agi ulih nerima pampas SOCSO laki tauka bini iya ke udah parai, laban sekumbang bini tauka laki nya agi idup, iya endang seruran mayar SOCSO. Nya alai, orang ke tinggal nya bisi hak nerima pampas SOCSO nya.
“Nya alai, aku suah udah nerangka pemerat mayar SOCSO ke tetiap iku pengereja pengawa, laban tetiap iku rayat Malaysia enda tau enda mayar SOCSO. Kitai enda nemu nama penusah ke tau nyadi ba kitai jemah ila,” ku iya.
Ku Phillip baru, mayuh orang agi enda nemu hak sida ba SOCSO. Nyema laki tauka bini sida udah parai, taja pan nyau betaun pengelama ari penusah nya udah nyadi,sida agi bisi hak minta bayar pampas ari SOCSO.
“Sekalika pemati laki tauka bini orang nya udah manggai 20 lebih taun, tang SOCSO nadai nimpuhka maya sida mayar pampa,” ku iya seraya ngelalau mensia mayuh datai ngagai opis SOCSO meresa rikod sida laban opis nya endang seruran bisi nyimpan rikod nya.
Phillip mega minta tulung raban NGO, orang ngatika diri, orang ke diau besepiak enggau kitai, enda tau enda madah ngagai sida pasal bantu ari SOCSO nya.
“Kami (SOCSO) tetap majakka pengawa ngiri penemu, ngaga licha ninting taun, lalu nyauka ninting bulan kami bisi tagit komuniti laban komuniti kitai tu besai. Nya kebuah kami begunaka media enggau NGO nyadi agen kami ngambika nyadung penerang tu ngagai mensia mayuh.
“Nyema bisi ditinggang penusah pemati, keingatka, betanya ngagai SOCSO dulu sekalika sida sebilik nya bisi mayar ngagai SOCSO ngelama tu sekumbang ke agi gawa tauka enda,” ku iya.
Ku iya baru, beratika rikod statistik diatu, ari bulan Januari nyentuk Mac taun tu, SOCSO Kuching bisi 818 iti kes lalu udah mayar urung RM2.8 million (Kuching aja) ngagai orang ti nampung ruang bilik nya.
Gaya tu dipeda majak nambah kelebih agi ba penusah bebadi di jalai alun, ke ngirauka ati kitai.
Kami bisi ngaga promosyen sereta aktiviti begulai enggau orang ti bekenaka mutosikal tauka deriba kerita, laban kitai deka meda sida tu mansang gawa sereta pulai gawa pulai enggau likun,” ku iya.
Taja pia, iya madah penemu pasal pengelikun sereta penguntung ke diulih ari SOCSO diatu udah majak nambah. Ku Phillip, berengkah ari 1 Jun tu ila, semua deriba teksi enda tau enda ngerijista diri ba SOCSO.
“Berengkah ari 1 Jun tu ila, semua deriba teksi enda tau enda mayar SOCSO,’ ku iya.
Kelimpah ari nya, iya mega madahka bungkur SOCSO ukai semina ba pekara mansang sereta pulai ari gawa, tang mungkur penuusah bebadi ba endur gawa, penyakit ke ditapi lebuh gawa sereta igi penyakit ke ninggang orang nya lebuh gawa, baka sakit buah pinggang, riman sereta penyakit bukai ke sama deka dibayar SOCSO.