Dikena bejalaika mayuh bengkah projek pemansang ti pulaika pengelantang rayat di Kapit
KAPIT: Agih belanja penyampau RM73.9 juta udah diungkupka Kepala Menteri (KM) Datuk Amar Abang Johari Tun Openg ngagai Bagi Menua Kapit bepun ari pengeransing iya deka meda pelilih tu majak mansang.
Penyampau tu dipadahka iya ba mua bala mayuh maya Pengerami Makai Lemai Pemesai Begulai Enggau Rayat di Dewan Suarah Kapit ditu, malam kilah ensana.
Ku iya, penyampau tu mungkur ngaga Jalai Nanga Menuan (RM12 juta), Jalai Nanga Ibau/Ulu Sungai Ibau (RM12 juta), ngaga Opis Pelilih Mit Merit (RM5 juta), SJK Min Tak (RM 2 juta), SJK Hok Lam (RM500,000), SJK Hock Hua, Song (RM100,000), Gerija Baru Methodist Iban Kapit (RM5 juta), Pendam Gerempung Dayak Sarawak, Gerempung Foochow enggau Gerempung Kwang Tung (RM2 juta) enggau jalai ngelawa Sepital Kapit (RM3.3 juta).
“Dikena kitai ngemanahka agi pasar Kapit, kitai ngungkupka belanja sepenyampau RM12 juta dikena ngemanah Pegung Lily (Panggau Danau) enggau RM3 juta diungkupka pengawa ngubah pasar Kapit. Kelimpah ari nya, agih RM3 juta diungkupka dikena ngaga ‘waterfront’ Song enggau RM14 juta dikena ngaga projek ke sebaka di Belaga,” pia ku iya ngerintai.
Abang Johari madah, pemutus ngungkupka agih tu endang digaga laban diatu udah maya iya ngubah pelilih Kapit nyadi menua ke lebih agi mansang.
“Semua projek tu meseti deka belabuh digaga dalam kandang tiga taun ti deka datai.
“Tu mega dikena kitai nempa pengidup ke meruan agi lebih agi ba tikas penatai pemisi rayat ditu.
“Ari tu kitai ulih ngubah Kapit badu agi nyadi ‘pulau’,” ku iya madah baru.
Nambahka nya, ku iya, semua penyampau nya enda disengkaum enggau pemutus perintah nengeri numbuhka Ejensi Pemansang Ulu Rajang (URDA) ti betuaika Sapit Kepala Menteri II Tan Sri Datuk Amar Dr James Masing lalu disaup Sapit Menteri Pemansang Menua Pesisir enggau Kandang Menua (KKLW) Datuk Alexander Nanta Linggi nyadi sapit Masing.
Kelimpah ngira pemansang infrastruktur ke bukai, Abang Johari maya tu bela madah siti ari juluk ati iya iya nya deka meda pelilih Kapit dikemansangka enggau projek biodiversiti.
“Di Kapit kitai engkeman ngaga projek tu ti deka betandu enggau bioteknologi baka ngasilka ubat.
“Ari tu kitai ulih matak penatai bala saintis nyentukka saintis ba tikas dunya ngaga pansik sebedau sida mujur tetemuka produk baru.
“Nangkan ke nya, pelilih Kapit deka dikelala ba serata dunya ari produk baru ti mega produk ke berega,” ku iya nerang.
Ba dagang temuai, Abang Johari madah, perintah nengeri mega deka ngaga Kaunsil Pemansang Pegung (LDA) ba tuju nyungkak produk dagang temuai nengeri tu.
Ku iya, tu engkeman dikena ngemanahka agi danau ba Tekat Ai Bakun, Murum, Baleh enggau Batang Ai ngambika tau matak mayuh agi temuai datai.
“Ari tu kitai ulih ngemansangka pengawa bekaul enggau penatai pemisi.
“Nya alai, kitai ngemeratka pemansang infrastruktur dikena ngemujurka pengawa tu,” pia ku iya madah baru.
Sama bela datai maya pengerami tu iya nya bini iya Datin Amar Datuk Juma’ani Tun Tuanku Bujang, Sapit Kepala Menteri I Douglas Uggah Embas, Masing, Nanta enggau Menteri Pemansang Perengka Guna Mensia Mayuh Dato Sri Stephen Rundi Utom sereta bala pemesai enggau pengari rayat ke bukai.