SRI AMAN: Opis Menteri Pengerai Malaysia (KKM) sedarka pemesai guna pekara pengelikun enggau pengerai pengereja pengawa berindik ari bala staf sepital seruran betapi enggau bemacham ‘hazard’ ba palan kereja sida.
Nya alai, Komiti Pengelikun Enggau Pengerai Kereja (JKKP) ba sepital ditumbuh sereta ditegapka agi kena ngerapit kaul kerejasama entara orang ngaji enggau pekereja ba pengawa nambahka pengelikun enggau pengerai ba endur gawa, seriris enggau peminta Akta Keselamatan dan Kesihatan Pekerjaan 1994.
Menteri Muda Ekonomi Menua Pesisir enggau Ulu sereta Kebun Bedandang Besai Sarawak, Datuk Francis Harden nerangka Akta Keselamatan dan Kesihatan Pekerjaan udah digaga kena 25 Februari 1994 lalu tuju iya kena nentuka pengelikun, pengerai enggau pengelantang semua orang ba endur gawa.
“Iya udah digaga belalauka konsep atur kediri enggau tanggungpengawa besai nentuka pengelikun enggau pengerai ba endur gawa ngagai sida ti napi risiko lalu gawa enggau risiko,” ku iya lebuh bejadika ‘World Day Safety and Health at Work’, Sepital Sri Aman ungkup taun 2017 bepalan ba Bilik Mayuh Guna, Balai Suarah Sri Aman semak ditu pagi kemari.
Ku Harden, akta tu nyediaka proses randau ba renggat pemun enggau penumbuh Kaunsil Menua ungkup Pengelikun Enggau Pengerai Kereja (KKP).
“Pejalai pengawa berunding mega nyengkaum program pengelikun enggau pengerai ti dipejalaika orang ngaji sereta pengari pekereja nyadi kaban komiti pengelikun enggau pengerai.
“Akta tu ngembuan 67 seksyen ti dibagi ngagai 15 bagi lalu disempulang enggau tiga jadual. Tiga bagi ti besai madahka tuju Akta enggau nyediaka infrastruktur kena nyiri bala pemesai enggau Majlis Negara. Isi Akta tu agih ba bagi IV dataika VI. Chunto iya, orang ngaji, orang ti bekereja kediri, pereka bentuk, pengilang, pemekal enggau ke bukai sereta sida ti bekereja enggau risiko iya nya pengereja pengawa,” ku iya.
“Tuju program sehari tu kena meri penyedar ngagai semua orang gawa pasal occupational diseases. Ngambika semua nemu, Sepital Sri Aman ke diatu bisi ‘Occupational Medicine Clinic’ ti diatur Direktor Sepital empu,” ku iya nerang baru.
Sama bisi datai Direktor Sepital Sri Aman, Dr. Balachandrans Sayapathi, Penulung Pemesai Perubat, Jarit Anyai sereta bala bukai.
Rambau program nya, Harden mega bisi nyuaka geran perintah penyampau RM23,000 ngagai Kaunsil Temuai Sepital Sri Aman ti diterima Sekretari Komiti Kausil Temuai, Mostapha Tugo ke deka dikena nukar bangku ba sepital nya.
Seraya RM5,000 diagih ngagai Kelab Perubat Sarawak Pampang Sri Aman ke diterima Abdullah Sanyut sereta RM 10,000 da agi diagihka ngagai Kelan Ping Pong Sri Benak, Sri Aman.