KUCHING: Koperasi di Sarawak dipinta ngerembaika agi bidang baka dagang temuai kelimpah ari koperasi ungkup renchit.
Menteri Pemansang Industri enggau Orang Dagang, Pengawa Dagang enggau Pemeranak Puku, Datuk Amar Awang Tengah Ali Hasan madah, nya alai koperasi patut ngembuan ejen ti pemadu tegap.
Iya bepenemu Sarawak sebuah nengeri ke kaya enggau adat sereta main asal kelimpah ari rampa menua ke besai sereta utai tumbuh enggau utai idup ke nyelai, ke ulih nyadi produk dagang temuai lebih agi di menua pesisir.
“Kitai patut bisi sebengkah ejen ti pemadu tegap sereta amat ulih mantu raban bansa kitai kelebih agi ti diau di menua pesisir dalam industri dagang temuai.
“Kitai nemu kebuah temuai datai nemuai kitu ukai deka meda rumah tinggi tang sida rindu meda raban bansa kitai ke kaya enggau adat enggau main asal sereta utai tumbuh enggau utai idup ti tebal agi di menua pesisir.
“Nya alai, nyema koperasi ulih berundingka pekara tu, ejen ke amat tegap sereta deka meri penguntung ngagai sektor dagang temuai lalu meri peluang besai ngagai orang di menua pesisir,” ku iya seraya madahka koperasi mega patut mungkur industri halal, reta tanah enggau ke bukai.
Awang Tengah ti mega Menteri Pengatur Pemansang Pengeraja Asal enggau Rampa Menua mansutka pekara nya lebuh bejaku ba pengerami nutup Seminar Padan Niaga “Peluang-Peluang Perniagaan Dan Pengurusan Kewangan” ke diatur Suruhanjaya Koperasi Malaysia ba sebuah hotel ditu, kemari.
“Kitai diatu bedau bisi sebengkah ejen ke amat tegap ti bisi kaul ukai semina ba renggat nengari aja tang patut jauh ngagai renggat antarabansa,” ku iya.
Nyerumba bejadika seminar nya, Awang Tengah diberi basa bejadika Produk Ez-Pump (Koperasi Kolej Vokasional Kuching Berhad).
Lebuh ngenang pasal produk nya, iya madahka produk nya diasil nitihka inisiatif enggau penemu nembiak kolej nya sereta sukung ari pengajar.
Produk Ez-Pump udah nyereta Program ‘Skim Usaha Permulaan Bumiputera’ (SUPERB) ke diatur Unit Peneraju Agenda Bumiputera, Opis Menteri Besai ti dipasuk urung 700 iku penyereta tumu nyengkaum ari sekula, institut pelajar tinggi, gerempung nembiak di serata menua.
“Koperasi tu udah mujur ngayanka penyulut nyema bisi kerejasama ari semua piak, sida udah mujur bulih geran sepenyampau RM500 ribu ke diberi ari sukut R&D enggau nyual produk.
“Penyulut sida tu patut nyadika teladan ngagai semua orang dagang enggau koperasi ngambika landik agi nengkebang sereta ngerebut peluang ke bisi dikena bejalaika aktiviti dagang ke udah bisi,” ku iya.
Kelimpah ari nya, Direktor SKM Pampang Nengeri Sarawak Osman Ismail dalam jaku pengelalu madah, penyampau semua koperasi di Sarawak naka 31 Disember 2016 bisi 978 buah koperasi ti mungkur 322,881 iku kaban.
Ba seminar nya bisi empat keretas kereja dipejuraika iya nya Pengurusan Kewangan ari Agensi Kaunseling dan Pengurusan Kewangan; Peluang Perniagaan dalam Industri Pelancongan (Gabungan Koperasi Majlis Perunding Melayu Berhad); Pelaburan Emas Satu Alternatif ( Public Gold) enggau Hyrax Oil Satu Peluang Perniagaan (Hyrax Oil Sdn Bhd).
Sama bisi datai ngagai pengerami nya kemari, Menteri Muda Pemansang Orang Dagang Datuk Mohd Naroden Majais, Direktor Kolej Vokasional Kuching Ng Fook Yin enggau ke bukai.