Tu ngujungka pengerugi ba sida laban nadai disengkaum nerima latih, bantu
KUCHING: Raban orang dagang di Sarawak ti bedau ngerejista diri ba ejensi perintah ke bekaul mengkang mayuh, ku Menteri Muda Pemansang Orang Dagang Datuk Mohd Naroden Majais.
Iya pechaya enda kurang ari 40,000 iku orang dagang nyengkaum sida ke ngaul diri ba dagang mikro bedau ngerejista.
Pekara nya ku iya nyadi pengerugi ngagai orang dagang ketegal sida enda disengkaum ba mayuh bengkah program latih ke disedia nyengkaum bantu ke bisi diberi perintah.
“Sekumbang aku nyadi menteri muda pemansang orang dagang kenyau ari 2005, semina 6000 aja pedagang bisi ngerejista diri ba ejensi perintah.
“Tang ba pengujung taun 2016, urung 50,000 orang dagang udah ngerijista diri ba SME Corp Sarawak.
“Aku pechaya mayuh agi orang dagang kelebih agi ke ba dagang mikro bedau ngerejista diri ba ejensi perintah.
“Asai aku bisi urung 30,000 nyentuk ngagai 40,000 di serata Sarawak ke bedau ngerijista,”ku iya.
Iya mansutka jaku nya rambau bejadi Licha Transformasyen Gudang Mit enggau Jelan Pemsai (PKS) 2017 di Bilik Aum Opis Produktiviti Malaysia (MPC) ditu, kemari.
Berindik enggau nya, Naroden ngelalau ejensi perintah baikka nya ba Perintah Besai sereta Nengeri begempung ngadu program ke tau matak orang dagang tu ngerejista dagang sida.
“Bisi 60 ejensi perintah ti ngadu mayuh bengkah program ditu lalu enti semua ijinsi nya begempung, orang dagang di nengeri tu deka bulih pemaik,’ku iya.
Iya ke mega Menteri Muda Pengatur Pengeraja Asal ngelalau orang dagang nambah penau sida ba pekara internet ngambi tetitihka singkang atur dagang ba dunya baru tu.
Ku iya, nengah embing Kepala Menetri Datuk Amar Abang Johari Tun Openg, teknologi pemadah engau komunikasyen(ICT) di nengeri tu deka diangkat tinggi agi lalu orang dagang meseti nemu nguna teknologi nya ba atur ngerembai dagang sida.
“Ketegal nya kitai meseti ngangkatka kualiti, tusun kereja enggau chara ngelaku ngambi kitai ulih besemekih enggau orang bukai lalu ngelaku produk diri nengah ICT,”ku iya.
Ba pengawa nya, Naroden bisi nyuaka setipikit ‘geran’ pemansang dagang ngagai penyereta.
Bela datai Direktor MPC Sarawak Tengku Azmi Tengku Majid, Ketuai Bagi PKS Samat Julai, Direktor SME Corp Sarawak Esmawady Mohd Esa, Direktor Lana Corporation Sdn Bhd Mohammad Hafidz Rohani sereta orang bukai.