SARATOK: Parlimen P205 Saratok diatu majak richah enggau bemacham program ke diatur bala pelobi ti keran deka nyadi pengari rayat, berindik ari Pengawa Bepilih Besai Ke-14 (PRU14) ke deka diatur enda lama agi.
Seiku ari chalun ti benung chakah bejalai nyadi pelobi Parlimen Saratok iya nya Subeng Mula ari Parti Demokratik Progresif (PDP).
Subeng, 53 taun, seiku peranak asal ari Kaki Wong Saratok.
Ari pekara pelajar, Subeng terubah besekula ba SK Nanga Drau Saratok lalu udah nya nampung pelajar ngagai Sekula Sekondari (SMK) Engkilili, SMK Sri Aman kelimpah ba Kolej Datu Patinggi Abang Haji Abdillah, Petra Jaya Kuching sebedau ke belajar ba UiTM.
Iya berengkah gawa di Bintulu dalam taun 1985 enggau kompeni Petronas.
Ba taun 2000, iya muka kompeni dagang kediri empu, ngujungka iya terus nyadi orang dagang nyentuk sehari tu.
Subeng udah nirika ruang bilik lalu bisi dua iku anak; seiku lelaki lalu seiku indu.
Dalam program Randau Begulai Enggau Komuniti ba dua buah rumah panjai di Parlimen Saratok ujung minggu nyin tadi, tebal agi bala komuniti ngumbai pengawa Subeng ke ngatur strategi nyadi pelobi ba kandang menua tu iya nya endang chukup manah ngagai peranak di Parlimen Saratok.
Ketuai Raban Nembiak N39 Krian, Kaunsilor Jeffry Jimbun, madah Subeng tu chalun pemadu manah nyadi pengari rayat maya PRU14 ti deka datai laban iya ngembuan penau nyadi ketuai.
“Subeng peranak asal ti ada ba Parlimen Saratok ti bisi peneleba gawa lebih 30 taun dalam bidang atur pengawa.
“Ari pekara politik, keterubah suba iya kala ngaul diri dalam dunya politik begulai enggau Parti Bangsa Dayak Sarawak (PBDS). Ari nya mih, Subeng berengkah nelebaka diri dalam dunya politik lalu udah dipeda sekeda ketuai parti bisi penau nyadi ketuai.
“Nya alai, lebuh iya nyereta PDP, renggat ketuai udah ngelempaika pengandal ngagai iya ngatur pejalai nyadi pelobi ba menua tu ngambika bekelala lalu nginti sukung ari rayat ba renggat baruh,” ku iya.
Nitih ku Jeffry, ari pekara personaliti, Subeng seiku orang ti chukup nyamai enggau begulai.
Ba lansa bukai nengah dua bengkah program Randau Begulai Enggau Komuniti ba Rumah Nangkai, Panjang Atas, Roban enggau Rumah Chunggat, Munggu Ubah, Ulu Kabo, Krian, Saratok, Subeng dalam jaku dipansutka iya madah, pengawa iya mandangka diri nyadi pelobi ba Parlimen Saratok, ukai semina nitihka peneka diri empu aja tang mega ari sukung enggau peransang ari raban ketuai parti.
Pengawa tu mega asil ari timbal renggat akar umbi ti begunaka ketuai baru nangkup sereta ngiring atur pengawa ba Parlimen Saratok.
“Sukung ke majak nambah ninting hari ba tetiap aktiviti ke udah diatur kitai ngelama tu udah meri peransang sereta pengandal ngagai kitai ransing agi nyadi pelobi ba sitak tu lalu gawa minta pemansang ungkup komuniti di Parlimen Saratok,” ku Subeng nerang baru.
Berebak enggau program nya mega, Subeng bisi nyuaka pemeri ari kuchik iya empu ngagai komiti rumah panjai ke udah kiruh nyendiaka pengawa nyambut penatai sida seraban.