SIBU: Agih belanja ke chukup patut diungkupka ngagai mengeri Sibu dikena mulaika nama mengeri tu tebilang baka dulu suba.
Menteri Muda Pemansik Sains enggau Bioteknologi Dr Annuar Rapaee madah, dalam 30 ngagai 40 taun sebedau tu Sibu tebilang dikelala enggau mengeri pengeluar asil ari kayu ramu.
“Diatu Sibu dikelala ari belakang mengeri Miri enggau Bintulu.
“Nya alai, kitai ngarapka Sibu diungkupka enggau agih ti chukup dikena kitai nyungkak pemansang mengeri tu,” pia ku iya madah.
Iya mantaika jaku tu maya bejadi Pengerami Makai Lemai Kelab Rama, Lumba enggau Main Opis Kaunsil Menua Pesisir Sibu (SMC) ba sebuah hotel tebilang ditu, kilah ensana.
Sama bela datai maya tu iya nya Residen Sibu Hii Chang Kee, Sapit Chairperson SMC Rogayah Jermain enggau Chairman Kelab Rama, Lumba enggau Main SMC sereta bala bukai.
Annuar ti mega Kaban Kunsil Nengeri (ADUN) Nangka madah, ketegal nya mega rayat mengeri Sibu enda semina deka mendingka langgur pemansang aja nyengkaum perambu pemansang ekonomi digital ti dipadahka Kepala Menteri tang dekaka semua langgur nya dipenyadika.
“Rayat ditu udah mayuh ningga macham bengkah perambu pemansang.
“Tang rayat ditu ukai semina deka ninga aja tang deka meda semua tu dipenyadika,” ku iya madah baru.
Nambahka nya Annuar madah, iya suah meri jaku lalau ngagai bala kunsilor ngambika sida semampai chakah bejalaika pengawa.
Ku iya, raban tu ukai semina nentuka pemujur pemansang baka ari sukut infrastruktur aja tang bela ngira pengelikun pengidup pupu bansa ke diau ngiga pengawa ba mengeri Sibu.
“Aku mega pechaya pengeransing kita tu deka disukung bala rayat ke diau di mengeri Sibu ditu.
“Ngarapka semua raban SMC anang tendu bejalaika pengawa ke udah dilempai ngagai sida,” pia ku iya madah.
Ba pengerami tu Annuar bela dipebasa nyuaka peransang pelajar ngagai nembiak ke mujur ba peresa UPSR, PT3, SPM enggau STPM.
Iya mega bela nyuaka kelai basa ngagai raban SMC ti udah pinchin gawa.