Uggah madah entara palan tu iya nya di Limbang, Tebedu, Betong, Tanjong Datu enggau Sri Aman
LIMBANG: Sarawak udah ngelala sekeda endur di selampur nengeri dikena bejalaika Palan Ngukun Produk Orang Bumai Menua Pesisir (RFPCC), nyengkaum di Limbang, adap Utara Sarawak ungkup makit eksport ngagai menua Brunei.
Sapit Kepala Menteri sereta Menteri Betanam Betupi Moden enggau Ekonomi Menua Pesisir, Datuk Amar Douglas Uggah Embas madahka palan ngukun asil ke bukai iya nya di Tebedu, Betong, Tanjong Datu enggau Sri Aman.
Palan tu dikena perintah mutarka pemar ditapi orang bumai menua pesisir nyual produk sida, nyerumba Program Transformasyen Menua Pesisir (RTP) dipejalaika perintah nengeri tu.
“Endang patut bisi palan ngukun dibuka ba Limbang berindik ari makit Brunei semina besepiak aja,” ku iya rambau aum pengarang berita pengudah bejalai ngabas Palan Betanam Betupi Kubong di Limbang kena Hari Enam tu tadi.
Bela bisi datai nyempulang iya, Menteri Muda Pengelantang Pendiau enggau Pengelantang Raban Bansa Dr Abdul Rahman Ismail, Menteri Muda Ekonomi Menua Pesisir enggau Ulu sereta Pengawa Berikan Datuk Julaihi Narawi, Kaban Parlimen (MP) Limbang Hasbi Habibolah, Kaban Kunsil Nengeri (ADUN) Batu Danau Paulus Palu Gumbang, Sapit Residen Limbang (Pemansang) Selamat Jati Yanjah, Chairman Kaunsil Pelilih Limbang Sufian Mohat sereta Pemesai Betanam Betupi Limbang Rosahhajah Mohidi.
Ku Uggah, raban orang bumai di Sarawak endang ditemu bisi pengelemi dalam pengawa nyual produk sida ketegal kurang mekanisme sukung, ambika chunto ti suah dipeda ba asil pengelandik jari.
Ari baruh konsep RFPCC, Opis Betanam Betupi enggau Opis Dagang Betanam Betupi Perintah Besai (FAMA) deka mantu dalam pengawa nugung produk ungkup dijual.
Ku iya, Sarawak bisi penanu ngeluarka buah pisang ungkup eksport ngagai menua China lalu sibau udah dieksport ngagai makit besai tu nengah palan di Sri Aman kenyau ari bulan November taun nyin tadi.
“RFPCC ukai semina nangkup pengawa ngukun tang mega nginjin, nyimpan enggau ke bukai,” ku iya.
Uggah beratika potensi besai di Limbang nyadi hub produk dagin kerebau berindik ari peminta tinggi ba domestic enggau di Brunei, kelebih agi maya hari besai.
Pia mega ku iya, Limbang nyadi palan pengeluar kerebau asal di nengeri tu, enggau banci dalam taun 2000 nunjukka nyauka manggai 11,000 iku kerebau di Sarawak ditemu ditu.
Urung 5,500 iku kerebau di Limbang taun nyin kemari.