KUCHING: Peranak menua tu terus nyukung raban bejalaika pengawa pengasih, Help Somebody, ngambika ulih suah agi bejalai ngabas sereta meri peransang ngagai mensia mayuh, pia ku pemungkal iya Dr Dalvinder Singh.
Ku iya, pengawa sukung nyengkaum datai nengah pengawa volunteer tauka pengawa bukai.
Dr Dalvinder dirandau rambau pejalai ngagai Sepital Besai Sarawak (SGH) ditu apin lama ke udah, lebuh iya begulai enggau 30 iku volunteer ke bukai nyadung 100 pikit pemakai enggau 80 pikit barang pemeresi ungkup kaban belayan pesakit ke diau ba kaki lima SGH.
“Sekeda sida tu nganti kaban belayan diri beputung lalu sida nadai palan bukai endur ngenduh. Enggau nya, kami nyediaka kereban diguna sida ngambika ulih diau lantang agi.
“Tuju pejalai iya nya berandau enggau sida lalu mayuh ari sida tu napi penusah sereta irau, nya alai, kami mendingka sebana sida ngambika ati sida lantang agi. Pekara ke besai reti ngambi sida enda ngasaika napi penusah nya kediri aja,” ku iya.
Naka diatu, lebih 300 iku nyadi kaban volunteer mantu program outreach komuniti. Bala sida tu datai ari semua serak pengidup nyengkaum bala lutur, pengajar enggau orang dagang.
“Bisi mega bala bukai enda ulih datai ketegal pengawa lalu sida semina ngirum pikit pemakai enggau barang pikit nyaga pemeresi ngagai kami ngambika disadung ngagai kaban belayan pesakit.
“Kitai ulih nempa penyelai semina ngereja pengawa nya, sereta kami deka nentuka sida tu nerima bantu ke patut. Nengah sukung ti mayuh kami engka ulih ngatur aktiviti tu suah agi,” ku iya nampung.
Kelimpah ari SGH, Help Somebody mega meri pikit nyaga pemeresi ngagai Sepital Miri lalu merambu deka ditampung ngagai Sibu enggau Bintulu dalam taun tu.
Perintah nengah National Welfare Foundation (NWF) mega bejalaika pengawa mantu ruang bilik nengah program ‘Anjung Kasih’.
“Anjung Kasih seruran nerima timbal ke manah. Ditumbuhka Yayasan Kebajikan Negara (YKN), kami mega nyukung YKN, nya alai kami bisi tiga Anjung Kasih di Sarawak, seiti di Kuching, seiti di Sibu lalu seiti da agi di Miri.
“Atur pejalai palan nya diatu diatur piak sepital ke bekaul. Ketegal peminta ke tinggi, ngelui ari penyampau bilih tauka katil ke bisi, pemerat diberi ngagai ruang bilik seranta sereta kaban belayan ti ditan berubat lama baka riman,” pia ku Menteri Pengintu Pengelantang Pendiau, Orang Indu enggau Komuniti Datuk Fatimah Abdullah lebuhka dirandau kemari (March 27).
Ngelansa pasal Help Somebody, Fatimah madah iya inisitif program Dr Dalvinder ti chukup manah.
“Lebuh diri sebilik bisi ditan berubat tau ngasuh kitai tusah ati. Pekara tu balat agi lebuh kita datai ari jauh.
“Program tu meri pengelantang ngagai sida maya begunaka saup orang bukai taja nadai kaban belajar, deka berandau, mendingka pengirau sereta mantu ba pekara bukai,” ku iya.
Batang pengawa rambau ngusung SGH apin lama ke udah iya nya pemerindang Sape ari menua French, Julien Cottet.
“Tu ngemai reti ke chukup ngagai aku nyadi pemerindang lebuh aku ulih merindang ati kaban belayan pesakit enggau nebah Sape ba kaki lima.
“Aku mega nerima mayuh timbal ke manah sereta ati chukup sinu lebih sida meri terima kasih lebuh aku bejalai ba kaki lima. Aku sedar bisi orang ti begunaka endar ke kami ngayanka penyiru diri lalu aku ngarapka program tu deka seruran diatur suah agi,” ku Julien.
Mensia mayuh ke bisi ati nyereta pengawa volunteer tau meda website www.helpsomebody.com.my.