KUCHING: Parti Reformasi Negeri (STAR) ngasai pengawa Perintah Nengeri meli Palan Hidro Lektrik (HEP) Bakun ari Sarawak Hidro Sdn Bhd (SHSB) seiti pemutus ke enda ngena.
Presiden STAR Lina Soo madah, Perintah Nengeri setuju meli HEP Bakun ke berega RM2.5 bilion nengah liabiliti RM6.15 bilion ari kompeni ti ngembuan aset beresi ari penyampau RM1.5 bilion naka taun 2015.
“Nengah pemutus meli HEP Bakun, reti nya nengeri tu nanggung utang RM8.65 bilion ke alai tetiap rayat ditu mayar RM3,200, ti nadai mai sebarang pemaik.
“Rayat Sarawak udah tusah napi Chukai Barang enggau Servis (GST) lalu pengudah meli HEP Bakun kitai Sarawak deka meri mayuh agi duit ngagai Perintah Besai sereta SHSB.
“Kitai udah bisi mayuh palan tekat ai baka ba Batang Ai tang agi mengkang enda ulih ngenampakka nengeri tu baka lampu jalai ngelingi Kuching iya nya di Batu Kitang, Batu Kawa, Landeh enggau kandang endur bukai,”ku iya.
Lina nambah, enti HEP Bakun ulih ngangkatka Sarawak nyadi nengeri pemekal kuasa elektrik, pekara keterubah patut diadu Perintah Nengeri iya nya nyendia lampu jalai ba kandang endur ke disebut.
“Bakun keterubah diperambu ba taun 1980 ke alai pengawa pemansang palan nya napi pemar, laun sereta begunaka ungkus besai kelimpah operasyen nadai mai penguntung.
“Sekeda tuduh madah leektrik deka dijual ngagai Semenanjung Malaysia, Indonesia, Filipina enggau Brunei tang aku agi nanya kini ke tunga kabel dalam tasik pemanjai 700 kilometer.
“Nambahka nya, industri elektrik di Semenanjung Malaysia empu napi pemar,”ku iya ba aum pengarang berita di Kuching kemari.
Berindik enggau nya, STAR ngelalau Perintah Nengeri dulu ngadu runding enggau rayat nengeri tu sebedau netapka pemutus ti nambah utang rayat kelebih agi ba maya ke diatu menua ngembuan utang manggai RM682 bilion.