MIRI: Bisi 10 iku pelajar enggau empat iku pengelicha ari International College of Advanced Technology Sarawak (i-CATS) bisi ngatur program raun seraya belajar ngagai Tekat Ai Hidroelekterik Bakun apin lama ke udah.
Bala pelajar tu ba taun kepenudi belajar ba tikas diploma elektrik enggau elektronik.
Koordinator kus Syuhaira Mat Zin madahka penemuai tu bisi mai bala pelajar ngasaika dunya nyata ba industri injinir elekterik.
“Sebedau tu sida semina belajarka teori aja lalu ditu sida ulih meda operasyen ke bendar ngasilka kuasa hidroelekterik.
“Penemuai tu mega nyediaka awak ngagai semua kitai belajaika atur pejalai pengawa ba tekat ari sereta pemar ditapi Sarawak Hidro lebuh iya digaga,” ku iya dalam sebengkah penerang berita.
Nitih ku iya, penemuai tu mega bekaul enggau subjek ti dipelajarka sida, iya nya kuasa elekterik, mechatronic enggau instrumentasi.
“Bala pelajar mega berasai gagit enggau pemutus perintah besai nyerahka tekat ai tu ngagai Sarawak.
“Tu deka muka mayuh agi awak ngagai pelajar Sarawak kelebih agi bala pelajar i- CATS ti ngambi kus injinir elektrik enggau elektronik ngambika gawa dalam sektor tu pengudah sida graduet,” ku iya nampung.
Seiku ari pesereta program, Syamin Wahid, 22 taun, madah tu keterubah iya iya ngindikka kaki ba Bakun.
“Sebedau tu aku semina ninga pemisi tekat ai Bakun aja, lalu sekali tu aku empu ulih ngasaika nam enggau baka ni gaya tekat ai tu ke bendar.
“Mayuh penemu ti diiri aku sehari tu, berat ba bidang ti dipelajar aku lalu tu ngasuh kami mereti agi pengawa dalam bidang tu dudi hari,” ku iya.