KUCHING: Seiku pesakit disleksia mujur bulih pengawa baru nengah bantu Anjung Singgah pengudah iya dibuai kereja sebedau tu.
Ranyie Kilau, 20 taun, gawa ba sebengkah supermakit tiga hari ke udah lebuh Opis Pengintu Pengelantang Mensia Mayuh (JKM) minta iya ngambi surat. Beduduk ari nya iya laun datai gawa ngujungka kompeni nya muai iya tekala nya. Nadai endur bukai dituju, seiku bakih mai iya ngenduh ba Anjung Singgah.
Kemari Anjung Singgah nulung Ranyie ngiga kereja baru ba sebengkah palan di Kuching ditu lalu iya mujur diterima gawa.
Berindik ari nya, Ranyie nadai bekal pemakai enggau perengka dikena tinduk. Nya alai, Anjung Singgah ngelawa Hope Place Kuching lalu minta saup gerempung ukai dikuasa perintah (NGO) nya mantu barang ke patut. Anjung Singgah mega mantu Ranyie minta kad Orang Nyelai Pendiau (OKU) ari JKM.
Pemungkal Hope Place Kelvin Wan nyaut peminta nya lalu nyuaka bantu barang pemakai baka berau, minyak makai, garam, gula, ruti, mi enggau milo, sereta mega pua enggau tilam (kereban tinduk) ngagai Ranyie.
Hope Place nyadi NGO ti ngabas ruang bilik orang seranta meri sekeda bantu barang diguna besehari-sehari baka barang pemakai baka berau, minyak makai, garam, gula, ruti enggau mi.
Mayuh ruang bilik suntuk belanja bulan, nya alai mayuh sida beterima kasih ke bantu barang ti dikenataika NGO tu.
Ngagai ruang bilik ke bisi anak nyelai pendiau tauka OKU, sida deka meri susu tepung enggau lampin.
Hope Place nganjung bantu dua bulan sekali laban mayuh ruang bilik dalam lis penerima sida. Naka diatu, sida mujur mantu lebih 170 ruang bilik.
Penerang silik chara minta bantu ari Hope Place tau betelefon nuju lumur 013-567 2775, 082 – 68 3378 (opis), berengkah ari pukul 8.30 pagi nyentuk 12 tengahari sereta ari pukul 2 lemai nyentuk 5 lemai ninting Hari Satu ngagai Hari Lima, lalu pukul 9 nyentuk 12 tengahari kena Hari Enam.
Kelimpah nya, mensia mayuh ti deka nyuaka pemeri wang ngagai Hope Place ulih dipasuk terus ngagai akaun Maybank 5112-8900-1160 (Persatuan Kebajikan Harapan Kuching).