Penanggul ti ditapi sekula nya deka diputar kandang setaun ari diatu nengah renggat keterubah RMK11
// Dikarang Chris Bishop //
PENGELALU NGENA ADAT ASAL: Penatai Ali ngulu Pengerami Ketuai Begulai enggau Rayat dikelalu ngena tanda ajat bansa asal ba pintu penama Balai Besai Kpg Merdang Gayam.
SAMARAHAN: SK Merdang deka digaga ba ‘Rolling Plan’ keterubah dalam Atur Pemansang Malaysia Lumpar ke-11 (RMK11), ku kaban Kunsil Nengeri (ADUN) Muara Tuang Dato Sri Mohamad Ali Mahmud.
Bejaku ngagai pemberita ensanus, iya madah, sekula primari ti nganti SK St Martin tu deka digaga ba palan asal sekula nya lalu disadang tembu dalam timpuh 8 nyentuk 12 bulan.
Tandu Ali, Perintah Nengeri nengah Opis Pelajar benung nusun pengawa ke patut ngambi sekula ti balat dipetalat ketegal mayuh penimpang nya ulih digaga enggau mujur.
Dulu ari nya rambau bejaku ba Pengerami Ketuai Begulai enggau Rayat ke diatur di Balai Besai Kampung Merdang Gayam, iya madah, ulih ngasai sebana mensia mayuh sentang penimpang sekula primari SK St Martin.
“Aku meretika pekara tu lalu udah mega dikenataika aku ngagai menteri ke ngintu pekara pelajar di Sarawak.
“ Betaun kitai udah nganti ke alai pekara tu udah dua kali ditanya aku ba dewan tang enda nemu kebuah, kelalu lama enda diputar.
“Pekara tu mega udah dikenataika aku ngagai Kaban Parlimen Kota Samarahan, Rubiah Wang ngambika iya mai pekara ke sama di parlimen,” ku Ali.
Ngenang kaul bukai Ali madah, perintah nengah opis menteri pemansang menua pesisir enggau kandang mengeri (KKLBW) udah ngemendarka agih belanja RM500,000 kena ngaga jalai di Kampung Sebayor, Samarahan.
Kelimpah ari nya ku iya, Gerija Anglika St Francis mega deka nerima bantu belanja penyampau RM150,000.
“Kitai deka ngagihka belanja nengah geran projek mit menua pesisir (MRP) ngagai mayuh genturung pendiau ngelingi Samarahan lalu nya nyengkaum Kpg Merdang Gayam, semua deka nerima,” ku iya.
Ba pengerami nya Ali ngagihka Kpg Merdang Gayam penyampau RM20,000 dikena ngaga palan endur ngengkah entukar ngelingi balai besai kampung nya sereta dikena meli perengka bukai.
Bela datai ngulu atur pengawa nya, Pengulu Belland Kantol, KK (Merdang Gayam) Richard Lait, Kaunsilor Samarahan Deli Joseph enggau orang bukai.