Anda di sini

Seliahka bepolitik di sekula

Sebarang program tauka aum bekaul enggau pekara politik enda patut diatur di sekula, ku Alexander

KANOWIT: Anang ngaga rumah sekula di nengeri tu nyadi palan alai ngerembaika agenda politik, ku Kaban Kunsil Nengeri (ADUN) Ngemah Alexander Vincent.

“Genap bengkah aktiviti enggau program ke diatur ba sekula patut bisi pemendar ari Opis Pelajar Nengeri tauka Opis Pelajar Pelilih Menua,” ku iya.

“Kitai enggai meda sida ke enda beradat ngatur sebarang program tauka aum bekaul enggau pekara politik di sekula.

“Raban sekula nyengkaum Kepala Pengajar, Chairman Gerempung Apai Indai Nembiak enggau Pengajar (PIBG), Tuai Opis Pelajar Pelilih Menua patut begempung sereta ngaga atur ke terit nentuka penanggul tu enda nyadi ba sebarang sekula ke bisi di nengeri tu,” ku iya.

Iya mansutka jaku lalau nya lebuh bejadi Pengawa Lumba Ninting Taun PIBG Sekula Primari (SK) Nanga Ngungun ditu, kena Hari Empat, minggu ke udah.

Sama bisi datai ba pengerami nya, Sapit Tuai Opis Pelajar Pelilih Menua Kanowit Berita Sabang, Pemesai Opis Pemadah Kanowit Wan Mohd Zuki Wan Ismail, Pengulu Ambrose Pengiran, Pengulu Barnabas Kadom, Pengulu Ijam Tuah sereta Kepala Pengajar SK Nanga Ngungun, Bundong Nibong.

“Sekula ukai endur ngerembaika pengawa politik, tang alai ngulihka pemandai,” ku Alexander.

“Nya alai, aku ngelalau raban sekula ngiarka sebarang orang ke enda beradat tauka nyeliahka sebarang pengachau ke datai ngusung sekula enggau tuju ati ngenataika penyarut sereta mantah perintah.

“Pengawa belajar enggau sekula enda tau dibalut enggau sebarang pengawa politik,” ku iya nandu.

Perintah semampai besedia mantu raban nembiak sekula, apai indai enggau piak sekula ari semua sukut nyengkaum belanja dikena ngemujurka pejalai pengawa sekula raban nembiak.

“Perintah enda kala leju meri bantu ngagai rayat dalam ba sukut pelajar enda ngira sekula di mengeri tauka menua pesisir.

“Semua deka dibantu ngambika ulih mujur sereta mansang dalam pengidup dudi ari,” ku iya.

Kelimpah ari nya, Alexander madahka pemujur enggau penyulut nembiak sekula SK Ngungun dipeda majak manah ninting taun sereta patut dikemeranka.

Pemujur sekula sereta aktiviti lumba enggau main patut sama dikemerat dikena ngadaka raban nembiak ke nyulut dalam sekula.

“Aku ngarapka raban apai indai begempung enggau piak sekula ngetanka pemujur anak sida sereta seruran nyaga nama sekula ari rusak,” ku iya.

Beserimbai enggau pengerami nya, Alexander madahka perintah deka nyadung 1,000 buah kantung sekula ungkup ngagai raban nembiak SK Nanga Ngungun bulan seiti tu ila.

Advertisement