Anda di sini

Rayong seruran nyukung program PIBG

Advertisement

ENGKILILI: Kaban Kunsil Nengeri (ADUN) Engkilili Dr Johnnical Rayong anak Ngipa deka seruran mendingka sebana rayat nyengkaum ba sentang penanggul pekara pelajar dikena nentuka pemujur bala nembiak sekula ba sitak nya.

Berindik ari nya, iya enda kala enggai enti bisi dikanggau sekula ngulu pengerami Merarau dikena mupu belanja nambahka pelanja sekula.

“Aku enda kala leju datai ngulu program ke diatur Gerempung Apai Indai enggau Pengajar (PIBG) laban aku deka mendingka penanggul enggau sebana ari sekula ba DUN Engkilili ngambika ulih diputar enggau lengkas lalu meri pemaik ngagai semua,” ku iya.

Dr Rayong madah munyi nya rambau Pengerami Merarau Gerepung Apai Indai enggau Pengajar (PIBG) Sekula Primari (SK) Engkilili N0 2 diatur ba balai sekula nya kena hari Enam ke udah.

Ba pengerami nya, Dr Rayong bisi madahka deka ngungkup Projek Mit Pemansang Menua Pesisir (MRP) RM7000 ngagai SK Engkilili N0.2

Berebak enggau nya, Dr Rayong nyadaka pengaga ati berindik ari pemujur tiga buah sekula iya nya SK Merebong, SK Empelam enggau SK Nanya Menyuau ke udah mandangka pemutus peresa ti nyulut dalam Ujian Penilaian Sekolah Rendah (UPSR) taun seiti ke udah.

“Aku ngarapka pemutus UPSR taun tu deka manah agi,” ku iya.

Bela bisi datai maya pengerami tu Kepala Pengajar SK Engkilili N0 2. Kulok anak Laga enggau bala tuai raban bansa di Engkilili.

Advertisement