Anda di sini

Projek jalai ke tejanggal di Sungai Lengan patut diputarka lengkas

Advertisement

Dikarang Judan Bungap //

DARO: Sekretari Politik Kepala Menteri Abu Seman Jahwie berasai sinu beratika penanggul ke nuntung peranak Sungai Lengan lebih agi pasal projek jalai di Sungai Lengan ke digaga taun 2008 suba nyentuk ke diatu lalu enda nemu tembu.

Berindik ari nya, Abu Seman minta raban ti bekaul lengkas nampung baru projek jalai ba Sungai Lengan nya.

Iya madah, jalai nya bangat beguna ungkup peranak menua nya ke agi tubah ngena perau enti deka ngelayang ke seberai.

“Kitai minta sapa-sapa ti besangkut paut ulih ngemujurka projek ke udah disebut tu laban projek jalai tu ila deka ngemuntangka pengidup rayat ba menua tu,” pia ku iya madah ngagai pengarang berita, kilah ensana.

Jalai kira sekilometer pemanjai nya deka meri penyamai ngagai enam buah rumah panjai iya nya Rumah Seli, Rumah Lanting, Rumah Igat, Rumah Bungkok, Rumah Jimmy enggau Rumah Jingga.

Sebedau tu rayat  menua nya kala mantaika sebana sida nengah surat berita madahka enda lantang ati enggau pekara nya ketegal ti kelalu lama nganti pemansang ke bangat enda ulih digaga.

Nambahka nya, projek jalai tu mega ku sida patut bendar ditampung ngelawa Rumah Guang ba Nanga Sungai Lengan enggau Rumah Kaming sebedau ditampung ngagai menua bukai baka Nanga Mawan enggau Nanga Singat.

Dulu agi ari nya Abu Seman bisi nemuai meda pemansang enggau penanggul ke bisi ditapi rayat ke nguan sitak Kunsil Nengeri (DUN) Daro berengkah ari Rumah Francis Kiai di Nanga Singat lalu udah nya ba Rumah Guang, Nanga Sungai Lengan sebedau ditangkan Rumah Igat enggau Rumah Jingga ke mega ba Sungai Lengan.

Abu Seman mega madahka diri setuju enggau penemu rayat di Sungai Lengan senentang minta jematan ngelayang sungai nya.

Jematan tu dikena ngelayang ke seberai ti deka betampung enggau jalai ke empai mujur digaga ba endur nya.

“Diatu kitai meda ba menua ke ngelingi Sungai Lengan udah mayuh kebun sabun dandang besai benung dikemansang.

“Nya alai, jalai enggau jematan tu deka ngubah pengidup rayat ditu lalu meseti digaga enggau lengkas,” ku iya madahka baru.

Ba pekara ti bekaul, iya mega ngelalau rayat di menua nya enda ibuh mai ngenataika sebana sida ngagai raban penyakal.

Kebuah pia ku iya, penyakal enda ulih ngemujurka projek tauka mutarka penanggul rayat tang landik besemaya aja.

“Perintah nengeri Sarawak lebih agi deka ngemansangka menua pesisir.

“Tang kitai minta rayat meseti bekerejasama enggau perintah Barisan Nasional (BN) ngambika pemansang ulih lengkas dikemujur,” ku jaku iya.

Rambau penemuai nya mega Abu Seman dibai ngabas gaya jelatung SK Sungai Lengan ke udah nadai pengelikun kelimpah ngabas sekeda rumah sekula ke bisi rusak.

Advertisement