Anda di sini

Nyaga sereta ngajar anak mit ti betapi enggau sindrom ‘Lubah Landik’, pengawa ti dikerinduka Evelyn Perol

Advertisement

KUCHING: Nyaga sereta ngajar anak mit ke bisi penimpang (OKU) tauka betapi enggau sindrom ‘Lubah Landik’ (Delayed Development – DD) endang pengawa ke dikerindu ke iya ari kelia, taja pan dalam bidang akademik, kos ke diambi iya nyadi pengajar enda tejapai maya umur biak tang pengerindu nya disambung pengudah muka Palan Penyaga Anak Mit ‘Milestone Early Intervention’.

Evelyn Perol, bansa Filipin jadi enggau peranak menua tu, Buma George madah, pengerindu iya ba anak mit endang ari kelia nyentuk diatu.

Pengudah jadi enggau peranak menua tu empu, apai indai seiku anak mit ke sama gerija enggau iya meda pengerindu iya ba kos ngajar anak mit ke ngembuan penimpang, apai indai anak mit nya lalu mayar ke iya ngambi kos ngajar mit ‘online’ datai ke iya bulih degree.

“Taja pia, pengerindu aku ngajar sereta pengerindu aku ke anak mit agi datai kediatu,” ku Evelyn ke nyaga 48 iku anak mit ke betapi enggau DD dalam dua sesi (pagi, enggau tengahari).

Enti nunda ku iya, nyaga sereta ngajar anak mit ke betapi enggau DD, begunaka seiku pengajar ba seiku nembiak (1:1) tang ba palan nya pegabis mayuh seiku pengajar ngajar tauka nyaga tiga iku anak mit sekali (1:3) ke betapi enggau mayuh disiplin (jaku, ulah, pengelandik sereta mayuh macham bansa DD).

“Tiap iku anak mit enda sebaka, sida iya bisi pengelandik diri empu,” ku iya ke endang siru enggau anak mit.

Penanggul sindrom Lubah Landik (DD) ulih temu berengkah ari anak mit nya ada nyentuk ke iya beumur 15 bulan. Sida ulih kelala ari ulah baka enggai senyum, lubah belajar bejalai, meragau, tauka ngena jaku ke muntang, lubah bejaku reti nya anak mit nya dijangka bisi betapi enggau DD, taja pan iya ukai sebengkah penimpang.

Lalu chara mutarka penanggul nya, anak mit nya dianjung ngagai palan intervensyen maya umur sida iya agi biak, laban tiap penanggul DD ulih diputar enggau manah.

Nya alai, anak mit ke dinjung ngagai Palan Penyaga Anak Mit ‘Milestone Early Intervention’, chara ngajar sida iya lain ari nembiak bukai, laban sekeda sida bisi ‘Disleksia’ tauka ‘Hyperactive’.

“Anak mit bansa tu, chara kitai ngajar mesti kreatif. Tiap iku anak mit tu bisi penyelai ari pangan diri. Peratika utai ti dikerindukasida, lalu ngena chara nya beri sida upah.

“Lebuh ngajar ABC, punka enggau urup ke muntang dulu, baka “L”, udah nya baru ke tusah mimit. Lebuh ngajar sida iya ABC, anang semina ngajar urup aja, tang digaga chara kreatif mimit, bai sida iya belagu ngena urup nya,” ku Evelyn.

Iya nusuika peneleba iya udah ngajar anak mit ke betapi enggau DD dalam kandang 13 taun, sekeda nya ari umur 2 taun nyentuk sida beumur 12 taun, enggau pemujur ke landik bejaku dalam 5 macham jaku enggau lanchar.

“Bisi sekali, aku teterap ba belakang kelas, anak mit ke dijaga aku dalam timpuh ke lama nya, nyau iya ke landik bejaku. Maya aku terap, iya nanya aku ‘Are you,OK?’

“Nya alai, aku selalu madah ngagai apai indai, terima anak sida iya ke betapi enggau DD baka orang ke menyana, anang nganggap sida nyelai ari orang bukai.

“Ditu, enti anak mit DD tu landik ngereja pengawa, sida iya dipuji, ngambika sida iya nemu, pengawa ke digaga sida nya betul. Kami gaga enti sida iya udah nemu seiti, dua pengawa ke diajar kami,” ku iya.

Taja pia, Evelyn madah, iya kala nyaga sereta ngajar seiku anak mit Melayu ari umur iya 3 taun, tang laban lebuh nya palan nya agi dijaga gerija ‘First Baptist Church’, nadai dibayar tang udah nya, Evelyn muka kediri, bisi mimit bayar.

“Nyau kelama, aku baru beratika anak mit Melayu nya nadai agi nurun ngagai palan tu. Aku telefon indai iya lalu iya madahka diri suntuk enda ulih mayar penyampau ke patut.

“Ku aku madah ngagai indai anak mit nya, laban aku sinu ke anak mit nya enda belajar, ngasuh indai iya nganjung ngagai aku lalu barang ku penyampau ke patut diberi iya, aku enda ngira nya.

“Nembiak nya diatu udah masuk Primari Dua, udah landik bejaku baka nembiak bukai. Iya udah enggau aku ari 2008,” ku Evelyn ke endang siru ke anak mit, ukai ketegal ngulihka penguntug aja ku iya, tang mayuh agi nulung apai indai ke bisi anak betapi enggau DD.

Umur pengabis tuai dijaga Evelyn ba palan nya 12 taun lalu ke pengabis biak 2 taun.

“Aku rindu ke anak mit. Enti di gerija, aku ngajar di Sunday School, kala ngajar di tadika sereta ngajar nembiak mit ke kena ‘Down Syndrome’ enggau ‘Authistic’, nya pemun aku kelia ngajar nembiak mit spesil baka tu,” ku iya ke bekunsi muka Palan Penyaga Anak Mit ‘Milestone Early Intervention’ enggau laki iya.

Kelimpah ari nya, Evelyn madah ninting taun, nyauka Hari Krismas, palan nya deka ngatur Hari Diri Sebilik beserimbai enggau Hari Krismas.

Maya nya, ku iya, anak mit ke dijaga sereta diajar di palan nya ke udah mujur deka meri ‘testimony’ sida iya ngagai apai indai nembiak ke bisi anak betapi enggau DD.

“Baka meransang apai indai ke bisi anak baka tu. Nembiak ke dijaga sereta diajar kami deka bejaku, meri peransang ngagai apai indai tu. Bisi seiku anak mit ke meri testimoni balat ka bejaku, datai ke iya enda ngetu bejaku! Tu chara kami meransang sida iya, apai indai sereta nembiak mit.

“Aku mega bekunsi pemujur ba bala anak mit di palan tu enggau apai indai sida iya, utai ke dipelajar anak sida iya di palan nya ke hari nya lalu enti anak sida iya bisi pekara baru ke ditemu  nya pan aku bekunsi enggau apai indai sida iya.

“Nya alai, ku aku, tiap penanggul bisi ‘Hope’,” ku Evelyn.

Bedau lama tu tadi, Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah Abdullah bisi ngelawa palan nya, meda sereta mendingka licha ari Evelyn, laban Opis Menteri nya berunding deka muka sebuah palan ungkup anak mit betapi enggau DD, ke deka bekerejasama enggau palan bansa nya kelimpah ari sepital, wad beranak, kelinik enggau apai indai.

Advertisement