Anda di sini

Industri Mit Unit Pemansang Orang Dagang Bumiputera deka ditumbuh enda lama agi

Advertisement

KUCHING: Unit Pemansang Orang Dagang Bumiputera udah tetemuka dua bidang tanah di Petra Jaya endur numbuhka palan Industri Mit ungkup orang ti bejalaika pengawa dagang ari rumah.

Menteri nya Datuk Mohd Naroden Majais madah, pekara nya deka dibai ngagai Unit Pengatur Pengawa Nengeri (SPU) ba awak ke semak tu ngambika tau dipejalaika enggau lengkas.

“Pekara tu mega deka dibai ngagai Kepala Menteri ngambi teulihka sekeda belanja kena kitai ngemujur pengawa nyendiakka palan tu.

“Palan Industri Mit tu ila deka meri pengelantang ngagai orang dagang bumiputera ke bejalaika dagang tauka ngaga produk sida di rumah.

“Ba palan nya, sida ulih ngerembaika dagang enggau likun seretas lantang,” ku iya.

Naroden mansutka jaku tu ngagai pemberita pengudah bejadika ‘Program Keusahawanan: Pembuatan Produk Berasaskan Kulit di Pusat Galakan Perindustrian dan Pameran’ (SIPEC) ditu, kemari.

Dulua ari nya ba jaku bejadika program, Naroden ngansak penyereta enggau naka ulih ngambi pengelandik ari program ke disedia.

Ku iya, produk kulit ngembuan makit ke besai ketegal produk nya diatu bedau mayuh digaga peranak nengeri tu.

“Produk ke digaga ari kulit tu ngembuan pinta ti besai lebih agi ba produk baka beg, kasut, tali belulang, baju jikit enggau perengka bukai.

“Asil produk ke dipansut dalam nengeri tu bedau ulih nangkup pinta ba makit lalu ketegal nya kitai patut ngerebut awak tu.

“Peranak menua tu ila deka majak nambah ketegal pemayuh orang ari menua luar datai gawa ditu kelebih agi ba palan SCORE lalu sida tu meh endur kitai ngelakuka produk kulit ke digaga kitai,” ku iya.

Palan SCORE nyendiakka gaji ti besai, sida enda takut ngeluarka belanja meli produk kitai, tandu iya.

Program ke diatur dua hari berunggu kemari nyendiaka latih ngagai orang ngaga kasut enggau tali belulang ari kulit chapi.

Naroden nambah, orang dagang ke ngemeranka pengawa ngaga kasut enggau tali belulang diperansang ngerijista diri ba Palan Industri mit di Petra Jaya jemah ila.

Advertisement