KUCHING: Kepala Menteri Datuk Patinggi Tan Sri Adenan Satem madah pemesai guna bidang sains enggau teknologi dikena ngemansangka teknologi baru seruran deka dipajakka.
Iya madah pekara tu kelebih agi dalam ngaduka rampa menua, beratika gaya hari ke seruran berubah enggau bekal kuasa ke mayuh dikena.
“Nya kebuah pemerat teknologi rampa menua enggau sains ti disediaka sereta ngangkatka penemu tu ngaga mensia mayuh bekait enggau isu global.
“Pelajar rampa menua bekait enggau gaya hari ke seruran berubah nyadi seiti sabjek lalu bedau disengkaum dalam kurikulum sistem pelajar sekula,” ku iya.
Teks Adenan ke nyebut munyi nya dibacha Menteri Muda ba Opis Kepala Menteri (Promosyen Pelajar Teknikal) Datu Len Talif Salleh ba atur pengawa ‘16th International Organization for Science and Technology Education Symposium Borneo (IOSTE) 2014’ di sebengkah hotel ditu, kemari.
Kelimpah ari nya, iya madah simposium baka tu beguna ngagai Sarawak laban pemerat dalam pekara pelajar Sains enggau Teknologi (STE) dikena ngemujurka pemansang sereta ubah pengelantang komuniti.
“Pemerat teknologi deka mai mayuh penguntung ngagai Sarawak laban SCORE jemah ila ulih ngubah ekonomi komuniti menua pesisir di nengeri tu,” ku iya.
Bejaku mungkal program nya, Rektor UiTM Sarawak Prof Dato Dr Jamil Hamali madahka, nengah simposium tu bisi pemerat ngaga kaul global enggau raban ke bela ngambi bagi nengah pansik sereta pemansang dalam pelajar sains enggau teknologi.
Tu endang sukut ke beguna dalam industri inovasi enggau teknologi, ke nyadi pemerat entara menua Asia Tenggara ke ngembuan perengka guna pelajar ke moden.
Kelimpah ari nya tu mega insentif perintah kena ngadaka mayuh peluang ungkup orang beranakka puku di nengeri tu.
“Nengah SCORE, seiti agenda Program Transformesyen Ekonomi Malaysia udah muka mayuh peluang ngagai modal mensia.
“Taja pia, bala nembiak sekula di menua pesisir ngasaika sabjek tu tusah, nya alai sida enda ulih tejapaika ratio 60:40 ke dikearap ulih dijapai ulih menua tu ba tikas penyulut pelajar,” ku iya.
Nangkan ke nya iya madah UiTM diatu bisi program ‘Mengubah Destini Anak ungkup nembiak iya nya peluang kedua nyambung pelajar diri.
Ba simposium nya, urung 250 penyereta ngambi bagi nyengkaum ari menua Sweden, Brazil, USA, Jipun enggau Korea.
Urung 75 keretas kereja deka dibantaika bala pakar dalam sabjek tu iya nya Tan Sri Dato Sri Prof Ir Dr Sahol Hamid Abu Bakar (UiTM), Prof Dr Molly NN Lee (Pakar program dalam Pelajar tinggi di UNESCO Asia enggau Pasifik Biro Menua dalam Pelajar di Bangkok), Prof Dr Malin Ideland (Akademik dalam Etnologi di Universiti Malmo, Sweden), enggau Prof Dr Anthony Clark (Universiti British Columbia, Kanada).