SRI AMAN: Kaban Parlimen Sri Aman, Masir Kujat ngelalau rayat ngambika enda ngenggaika sistem Cukai Barang enggau Servis (GST) ke deka dipejalaika perintah bepun bulan April taun baru.
Masir madah, kebuah pia laban GSt ulih meri penguntung besai ngagai pengidup rayat di menua pesisir enggau ndang mengeri menua tu.
Berindik ari nya, GST ulih ngasilka kira RM27 bilion ngagai penatai pemisi menua nengah pupu chukai.
“Tu nyangka ulih diberi ngagai rayat nengah duit bantu kelimpah dikena bejalaika mayuh bengkah projek pemansang infrastruktur, rengka rama, pekara pelajar enggau utai bukai di menua tu,” ku iya.
Masir madah munyi nya rambau Program MEMBARA berambaika jaku ‘Jalinan Wanita’ di Rumah Asai, Kedumpai, Simunjan pagi ensana.
Ba pengerami nya MAsir bisi nyuaka geran ari perintah RM5,000 ngagai Komiti Pengelikun enggau Pemansang Genturung Pendiau (JKKK) Rumah Akau lalu RM2,000 ungkup komiti indu sida.
Nangkan ke nya, RM3,000 diberi ngagai Komiti Pengawa Enda Begaji (RELA) rumah panjai nya.
Kelimpah ari nya, Masir minta rayat bebasaka pengawa numbuhka Serakup Malaysia ke udah mujur nyerakupka pupu raban bansa di menua tu kenyau 57 taun ke udah.
“Aku ngarapka rayat terus besaup enggau perintah Barisan Nasional (BN) ngambika pemansang muntang dikemujur,” ku iya.
Bela bisi datai Pemesai Opis Pekara Khas (JASA) Parlimen Sri Aman Whelton Lumpoi, Supervisor Indu Misi Sepital Simunjan Winnie Kong, Datuk Johnny Alam, Suprintendan Entusa Aman, bala pemesai opis perintah enggau bala tuai raban bansa.