MIRI: Peranak Kampung Tanjung Tepalit Baram minta perintah nyirika baru ex Tuai Raban Bansa Kampung nya, James Nyurang Usang pengudah timpuh servis iya ambis kena 30 April tu tadi.
Sekretari Komiti Pemansang enggau Pengelikun Genturung Pendiau (JKKK), Yakod Jalong madah, tebal agi sida serumah agi bisi pengarap ngagai James Nyurang mangku pengawa nya.
“Kami peranak Kampung Tanjung Tepalit sama seati minta piak perintah berundingka baru nyiri James Nyurang nyadi Tuai Raban Bansa,” ku iya ditu, kemari.
Yakod madah, kenyau James mangku tanggung pengawa nya kenyau enam taun ke udah, peranak menua nya berasai puas ati meda pengawa ke udah dikereja iya.
“Nya alai, kami minta perintah ninga sebana kami lalu nyiri baru James Nyurang nyadi Tuai Raban Bansa ngambika setipak enggau genteran jaku ‘1Malaysia, Rakyat Didahulukan, Pencapaian Diutamakan,’ “ku iya.
Nangkan ke nya, iya madah peranak menua nya ngembuan hak milih tuai raban bansa ke patut sereta landik bejalaika pengawa baka ke udah dikereja James Nyurang ngelama tu.
Seiku ari kaban JKKK Kampung Tanjong Tepalit, Michael Apoi, 70, mega nyadaka langgur penemu minta James Nyurang diberi peluang mangku pengawa nya baru.
“Sida semenua udah teleba enggau pengawa ke dikereja James Nyurang bepelasarka utai ke dikereja iya sekumbang enam taun ke udah,” ku iya.
Iya madah, penyampau rayat ke nguan kampung nya diatu 70 pintu ruang bilik lalu sida sama sepenemu agi meri pengandal ngagai James Nyurang nyadi Tuai Raban Bansa.