Anda di sini

Anang sanggu ati ngasuh kompeni peribit ngemujurka pemansang

Advertisement

MIRI: Mensia mayuh di pelilih menua Miri patut nyerenih enggau silik  tetiap bengkah kompeni ke deka bejalaika sebarang pemansang ba kandang menua nya sereta beratika penyungkak pemansang ke deka diterima sida kelebih agi pemansang sosio-ekonomi.

“Anang nangi sereta seruran ngembuan buah penemu ke enda manah ngumbai raban kompeni tu deka ngerusak pengidup enggau kandang menua kitai,” ku Kaban Kunsil Nengeri (ADUN) Telang Usan Dennis Ngau.

Iya ngelalau peranak pelilih menua mit Baram lebuh ke bejadi program ‘Medical Outreach’ ke diatur ba Samling Central Base Camp ditu empai lama ke udah.

Program ke berengkah kena Hari Lima nyentuk ngagai Hari Minggu nya diatur raban Samling Group of Companies, Yaw Teck Seng Foundation, Sepital Miri, Opis Pengerai Kandang Nengeri, Dental Department, Unit Pharmasi enggau Raban Soldadu Menua Malaysia.

Program nya mega sebengkah ari tanggung pengawa ke dipejalaika Samling enggau raban koporat ke bukai (CSR) dikena beratika  pemanah ngembuan pengerai enggau pengelikun ke enda betatak ngagai peranak ke diau di pelilih menua nya.

“Operasyen pemansang ke deka dipejalaika sekeda raban kompeni peribit di Baram mega deka meri mayuh pemansang ke nguntungka rayat kelebih agi ngagai peranak di pelilih menua Miri, Marudi sereta pelilih menua bukai.

“Ukai semina perintah tau bejalaika pemansang di menua tu, laban kekadang perintah mega mayuh pengawa bukai dikemerat sereta ngujungka pemansang di sekeda endur diau nyadi lubah.

“Nya alai, rayat patut nerima sereta nyukung raban kompeni ke deka meri pemansang ngagai sida kelebih agi nyediaka kereban ke diguna rayat di menua pesisir nyengkaum jalai alun enggau mayuh agi,” ku Dennis.

Ba penemu nya, perintah nengeri enggau chukup basa ngelaluka sukung sereta bantu ari raban kompeni peribit meri pemansang ngagai rayat kelebih agi rayat ke diau di menua pesisir,” ku iya.

Rayat di menua tu patut begempung mantu raban kompeni peribit bejalaika pengawa ngemansangka sekeda endur diau dikena nyungkak pemansang sida.

Sama bisi datai ba program nya, Menijar Samling Group of Companies Andrew Wee, Direktor Sepital Miri Dr Jack Wong enggau Kapten (Dr) Mohd Hafiz Abdul Jalil ari raban Soldadu Menua Malaysia (ATM).

“Program tu chukup engkeman dikena muka runding rayat di pelilih menua tu sereta ulih meretika pemanah ngembuan pengerai enggau pengelikun ke badas,” ku iya.

Advertisement