Anda di sini

SUPP nyemetak ngenggaika TERAS enggau UPP

Advertisement

Dikarang Rengenyan Labang //

Kededua parti baru nya patut dipesetujuka semua parti dalam komponen BN sebedau diterima masuk

KUCHING: Sekali agi Parti Sa’ati Rayat Sarawak nyemetak penemu ngenggaika Parti Tenaga Rakyat Sarawak (TERAS) enggau Parti Rakyat Bersatu (UPP) disengkaum dalam komponen Barisan Nasional (BN), sekalika ba renggat perintah besai tauka nengeri.

Pekara nya dipadah sereta diterangka nengah resolusyen Komiti Kereja Pusat (CWC) maya Aum Besai Tiga Taun Sekali (TDC) ti Ke-23 ke  tembu ensanus.

Dalam resolusyen nya, SUPP madah, parti nya deka belalauka ‘Perlembagaan Barisan Nasional’ (BN) ti netapka sebarang penama parti politik baru ke dalam BN patut disukung semua parti komponen dalam BN.

SUPP bepenemu Menteri Perintah Menua Malaysia, Sapit Menteri, Menteri Muda, Sekretari Politik, pemesai ke dichirika dalam ejensi tiditetapka undang-undang, Tuai Mensia Mayuh, Tuai Raban Bansa enggau kaban kaunsil pelilih menua dalam perintah BN patut kaban parti komponen BN, ku resolusyen nya.

“SUPP nyemetak penemu enda setuju, TERAS enggau UPP masuk dalam komponen BN enda ngira ba renggat perintah besai tauka nengeri.

“SUPP minta Dato Sri Wong Soon Koh enggau Datuk Dr. Jerip Susil ke menang nengah tiket BN/SUPP ba Pengawa Bepilih Besai Menua Sarawak 2011 tang diatu masuk UPP patut ngetu nyadi Menteri tauka Menteri Muda dalam perintah nengeri, enti enda sida patut dibuai ari Kabinet.

“SUPP deka ngetanka enggau bebendar hak bediri dalam pengawa bepilih besai ba semua 19 penuduk Kaunsil Nengeri (DUN) enggau tujuh penuduk Parlimen ke diungkup BN ngagai SUPP. Pekara tu enda ulih diperunding,” ku dalam resolusyen nya.

Kelimpah ari nya, SUPP nyukung Kepala Menteri nengah kuasa Imigresen, nyekat orang luar ke ditemu bejaika pengarap, bansa lalu ngeruga menua tama ngagai nengeri tu sereta nganjung pulai baru orang nya nyema udah bisi dalam Sarawak, tu dikena nyaga penyerakup, pengelikun, kaul antarabansa sereta milih jalai pengarap ke dikedeka baka ti dikemeranka rayat Sarawak.

Advertisement