KUCHING: Kuasa hidro mikro chara ke pemadu manah dikena nyendiaka karan ngagai beberapa buah rumah panjai di Julau.
Tebal agi palan pendiau mensia mayuh ba sitak Julau betabur sereta mar deka nyambung karan ari kuasa grid, pia ku MP Datuk Joseph Salang.
Ku iya, ungkus ngena kuasa hidro mikro murah sereta manah agi enti dibanding enggau kuasa tau dikena baru nyengkaum kuasa solar.
“Kelimpah ari kuasa karan 24 jam ngagai rumah panjai di ulu entigis mikro hidro mega enda ngachau rampa menua enggau kampung di ulu din,” pia ku iya madah kena Hari Satu tu tadi.
Dulu ari nya, Salang bejaku munyi tu lebuh ti bejadika sistem tagang ba Sungai Sugai di Rumah Anthony Bau, Ulu Mulok, Julau.
Ku iya, naka ke diatu 1Malaysia udah melanja pengawa ngaga dua buah tekad ai kuasa mikro hidro dalam sitak iya, ke alai kededua nya sama udah ulih dikena.
Dua buah tekad ai kuasa mikro hidro digaga ba Rumah Michael Jantan, Nanga Bekatan enggau Rumah Jawang, Bukit Sri.
Salang ke mega Chairman Kunsil Penyanding Penemu 1Malaysia Sarawak madah, kededua tekad ai digaga peranak rumah panjai nya nengah chara beripai sereta ari baruh kemata Opis Kereja Raya (JKR).
Ku iya, tetiap buah projek beungkus urung RM350,000 enti digaga nengah chara beripai, bepanggai ba palan endur sereta penyauh.
Kuasa mikro hidro 10kW ba Rumah Michael nya udah ngelantangka 200 iku peranak rumah panjai nya.
“Enti maya hari manah sereta panas, peranak rumah panjai nya ulih nguna karan 24 jam tang enti maya hari ujan sida bisi besekat nguna karan,” pia ku iya.
Iya mega madahka tekad ai nya digaga meraka Sungai Kanowit, semina dua minit pejalai ari rumah panjai nepan perau, sereta urung 60km ari pasar Sibu.
Ku Salang, kuasa mikro hidro manah amat digaga ba Sarawak laban ti ngembuan mayuh sungai sereta rampa menua ke bebukit ba kandang genturung pendiau rayat ke betabur dalam nengeri tu.
Bekaul enggau peminta Tuai Rumah Anthony Bau ke minta perintah ngaga mikro hidro ba rumah panjai iya, Salang madahka iya deka berandau enggau raban komiti rumah panjai nya dulu.
“Keterubah endar, kita enda tau enda nemu sungai ke deka endur kita ngaga tekad ai nya.
“Sungai nya patut ulih ngasilka kuasa karan ke baka nya, enti enda pia nadai guna ngaga tekad ai nya,” pia ku iya.
Kuasa mikro hidro ulih ngasilka karan belabuh ari 1kW nyentuk ke urung 200kW.